बढ्यो सवारीसधान, पार्टपुर्जा र टायरको आयात, व्यवसायी भन्छन् : गत वर्षको असर

काठमाडौं – चालु आर्थिक वर्षको पहिलो ९ महिनामा नेपालमा सवारीसधान, पार्टपुर्जा र टायरको आयात बढेको छ ।

नेपाल राष्ट्र बैंकको तथ्यांक अनुसार चालु आर्थिक वर्षको पहिलो ९ महिनामा ९५ अर्ब ५४ करोड ९९ लाख रुपैयाँ बराबरको सवारीसाधन, पार्टपुर्जा र टायर आयात भएको छ । यो गत वर्षको सोही अवधिको तुलनामा २६.९ प्रतिशतले बढी हो । गत वर्ष सोही अवधिमा ७५ अर्ब २७ करोड १३ लाख रुपैयाँको सवारीसाधन, पार्टपुर्जा र टायर आयात भएको थियो ।

यद्यपि गत वर्षको लकडाउनका कारण भित्रिन नसकेका सवारीसाधन, पार्टपुर्जा र टायर चालु आवमा भित्रिदा आयात बढेको देखिएको नाडा अटोमोबाइल्स एसोसिएसनको भनाइ छ ।

यद्यपि हालको अवस्थामा बैंकहरुले सस्तो ब्याजमा अटो लोन उपलब्ध गराइरहेका छन् । त्यसैगरी धेरै ग्राहक निजी सवारी साधनतर्फ आकर्षित भएका छन् । कोभिड–१९ को प्रकोपका कारण उपभोक्ताहरु सार्वजनिक सवारीसाधनमा भन्दा निजीमा आकर्षित भएका छन् । सस्तो ब्याजदर र सहज फाइनान्सिङको व्यवस्थाले गर्दा निजी सवारी चढ्ने बढिरहेका छन् ।