चर्चामा एउटै नम्बर प्लेटका दुई मोटरसाइकल

काठमाडौं – सामाजिक सञ्जालमा आज एउटै नम्बरको मोटरसाइकल एकै स्थानमा देखिएको तस्बिर भाइरल बनेको छ । बुधबार बिहान साढे ८ बजेतिर प्रदीपजंग क्षेत्री गौशाला चोकमा ट्राफिक जाममा अड्किरहेका थिए । उनको नजर आफूभन्दा ठीक अगाडि रहेको दुई वटा पल्सर मोटरसाइकलमा पर्‍यो ।

दुवै मोटरसाइकलमा एउटै नम्बर थिए । पानी परिरहेकाले सवारी चालकले रेनकोट लगाएका थिए । तर मोटरसाइकलमा बागमती प्रदेश ०२ ०२२ प २३८० नम्बर थियो ।

उनले खिचेको सोही तस्बिर हाल भाइरल बनेको हो । यस पश्चात यो नम्बर कसरी एउटै रहन गयो भन्ने वारेमा पनि धेरैले चासो राखेका छन् ।

ट्राफिक प्रहरी महाशाखाले पनि यसवारेमा खोजी भइरहेको बताएको छ । काठमाडौं उपत्यका ट्राफिक प्रहरी कार्यालयका प्रवक्ता एसपी सञ्जिव शर्मा दासले ट्राफिक युनिटहरुलाई मोटरसाइकल नियन्त्रणमा लिनका लागि निर्देशन दिइएको जानकारी गराए।