नेपालमा बिक्री सुरु हुन नसकेको टीभीएस रोनिन अव स्पेसल एडिसनमा पनि

टीभीएसले आफ्नो मोर्डन रेट्रो मोटरसाइकल रोनिनको स्पेसल एडिसन लन्च गरेको छ । फेस्टिभ सीजनलाई लक्षित गरी भारतमा लन्च भएको सो मोटरसाइकलमा कम्पनीले केही फिचरलाई अपग्रेड गरेर नयाँ कलर थिममा ल्याएको हो । रोनिन स्पेसल एडिसन निम्वस ग्रे कलर स्किममा आएको हो ।

भारतीय बजारमा सो नयाँ एडिसनको मूल्य १ लाख ७३ हजार भारु निर्धारण गरिएको छ । जुन टप–स्पेक टीडी भेरिएन्टको तुलनमा ४ हजार भारुले महंगो हो । सो नयाँ एडिसनलाई आकर्षक देखाउन टिभिएसले यसको बडी पार्टमा तीनवटा कलर सहितको पेन्ट थिम दिएको छ ।

यसको ह्विल रिममा रोनिन ब्रान्डिङ गरिएको छ भने तल्लो भागदेखी हेडल्याम्प बेजलसम्म ब्ल्याक कलर थिम दिइएको छ । साथै यसमा यूएसबी चार्जर, भाइज र फरक तवरबाट डिजाइन गरिएको ईएफआई कभर लगायत एसेसोरिज थप गरिएको छ ।

सो नयाँ एडिसनको मेकानिकल र स्पेसिफिकेसन रेगुलर रोनिनबाटै लिइएको छ । जसमा २२५.९ सिसीको सिंगल सिलिन्डर आयल कुल्ड इन्जिन दिइएको छ । जसको पावर २०.१२ बिएचपी र टर्क १९.९३ एनएम रहेको छ ।

रोनिनलाई नेपालमा केही समयअघि सम्पन्न नाडा अटो शोमा आधिकारिक वितरक जगदम्बा मोटर्सले सोकेस गरेको थियो । भारतमा यसको स्पेसल एडिसन आइसक्दा पनि नेपालमा भने यसको बिक्री हालसम्म पनि प्रारम्भ हुन सकिरहेको छैन ।