रेडर बन्यो टीभीएसको सबैभन्दा बढी बिक्री हुने मोडल, मासिक ४० हजार युनिट बिक्री

बजारमा उपलब्ध भएको दुई वर्षको अवधिमै भारतमा टीभीएस रेडरले बिक्रीका आधारमा कम्पनीका अन्य सबै मोडललाई उछिनेको छ । त्यसैगरी १२५ सीसी मोटरसाइकल सेगमेन्टमा समेत पहिलो पटक टीभीएसले अन्य ब्रान्डलाई पछि पारेको छ । यस अनुसार रेडर टीभीएसको सबैभन्दा बढी बिक्री हुने मोटरसाइकल समेत बनेको छ ।

भारतको सोसाइटी अफ इन्डियन अटोमोबाइल म्यानुफ्याक्चरर्स (सियाम) को तथ्यांक अनुसार गत अप्रिल देखि जनवरी सम्म १० महिनाको अवधिमा टीभीएसले ३ लाख ९८ हजार ३५४ युनिट रेडर बिक्री गरेको छ ।

गत वर्षको सोही अवधिको तुलनामा यो १ लाख ७८ हजार ४० युनिट बढी हो । यस अनुसार कम्पनीले महिनामा औसत ४० हजार रेडर बिक्री गरेको छ ।

यति मात्र होइन, १०० र ११० सीसीका सबै टीभीएस मोटरसाइकल भन्दा रेडर नै बढी बिक्री भएको छ । सो सेगमेन्टमा टीभीएसले २ लाख ९५ हजार ४८२ युनिट मोटरसाइकल बिक्री गरेको छ । यसमा टीभीएसका स्टार सिटी, रेडिअन र स्पोर्ट जस्ता मोटरसाइकल छन् ।

त्यसैगरी बिक्रीका लागि आधारमा यो अपाचे भन्दा पनि अब्बल बनेको छ । गत आर्थिक वर्षमा टीभीएसले २ लाख ८१ हजार ४७६ अपाचे बिक्री गरेको यो आर्थिक वर्षमा ३ लाख १४ हजार १८ युनिट अपाचे बिक्री गरेको छ ।

नेपाली बजारमा पनि टीभीएसको आधिकारिक वितरक जगदम्बा मोटर्सले टीभीएस रेडर बिक्री–वितरण गरिरहेको छ । यद्यपि मन्दीको कारण मोटरसाइकलको व्यापार राम्रो नभएको प्रतिक्रिया टीभीएसका साथै अन्य सबै ब्रान्डले दिइरहेको पाइन्छ ।