टीभीएस रेडरको नयाँ ‘डाक्टर डुम’ संस्करण सार्वजनिक

काठमाडौं–टीभीएसले आफ्नो लोकप्रिय मोडल रेडरको एक नयाँ विशेष संस्करण ‘डाक्टर डुम’ सार्वजनिक गरेको छ । यस नयाँ भेरियन्टको मूल्य ९५ हजार ३२० भारु तय गरिएको छ ।

यो बाइक स्पेक्ट्रल ग्रीन रङमा उपलब्ध छ, जुन मार्भलको चर्चित पात्र डाक्टर डुमको हरियो पहिरन र धातुको आवरणबाट प्रेरित छ । बाइकको आकर्षक लुक्सका लागि यसमा स्टेप–सिट, कालो रङको एलोय ह्विल र सिल्भर हिट–शिल्डसहितको कालो एक्जस्ट (साइलेन्सर) समावेश गरिएको छ ।

इन्जिन र पर्फर्मेन्सको कुरा गर्दा यसमा १२४.८ सीसीको सिंगल–सिलिन्डर इन्जिन दिइएको छ, जसले ११.२२ बिएचपी पावर र ११.७५ एनएम सम्मको टर्क जेनेरेट गर्दछ । ५ स्पीड गियरबक्स जडान गरिएको यस मोटरसाइकलमा टीभीएसको आईगो असिस्ट प्रविधि,आईएसजी सहितको साइलेन्ट स्टार्ट, ग्लाइड थ्रु ट्राफिक र तीनवटा राइडिङ मोडहरू उपलब्ध छन् ।

सस्पेन्सनका लागि अगाडि टेलिस्कोपिक फोर्क र पछाडि मोनोशक सस्पेन्सन दिइएको छ । त्यसैगरी ब्रेकिङ प्रणालीअन्तर्गत अगाडि २४० मिमीको डिस्क ब्रेक र पछाडि ड्रम ब्रेक जडान गरिएको छ । यसअघि टीभीएस रेडर आइरन म्यान, ब्ल्याक प्यान्थर, वुल्भरिन र डेडपुलजस्ता मार्भल क्यारेक्टर संस्करणहरूमा पनि बजारमा उपलब्ध भइसकेका छन् ।