टु–ह्विलर बजारमा ठूलो उलटफेर, हिरो र होन्डालाई पछि पार्दै टीभीएसले रच्यो इतिहास

काठमाडौं — अटोमोबाइल बजारमा जुन २०२६ को बिक्रीले एउटा नयाँ र ऐतिहासिक मोड ल्याएको छ । लामो समयदेखि बजारमा वर्चस्व जमाउँदै आएका ठूला ब्रान्डहरू हिरो र होन्डालाई उछिन्दै टीभीएस मोटर कुल बिक्रीको आधारमा भारतको सबैभन्दा ठूलो टु–ह्विलर ब्रान्ड बन्न सफल भएको छ ।

हालै सार्वजनिक भएको तथ्याङ्क अनुसार, टीभीएसले जुन महिनामा मात्रै ५ लाख ६५ हजार ४१७ युनिट बाइक बिक्री गरेको छ । यो गत वर्षको सोही अवधिको तुलनामा ४७ प्रतिशतको ठूलो वार्षिक वृद्धि हो ।

टीभीएसले आफ्ना बलिया प्रतिस्पर्धीहरूलाई निकै पछाडि छोडेको छ । यो महिना हिरो मोटोकर्पले ५ लाख ४१ हजार १५९ युनिट र होन्डाले ५ लाख २८ हजार २८१ युनिट मात्र बिक्री गर्न सकेका छन् । होन्डाले २६ प्रतिशतको सकारात्मक वृद्धि दर्ता गर्दा हिरोको कुल बिक्रीमा भने करिब २.३ प्रतिशतको सामान्य गिरावट देखिएको छ ।

निर्यात सहितको कुल बिक्रीमा टीभीएसले बाजी मारे पनि भारतको आन्तरिक बजारमा भने कथा केही फरक छ । आन्तरिक बजारको कुरा गर्दा टीभीएस अझै पनि यी दुवै ब्रान्डभन्दा करिब १ लाख युनिटले पछाडि छ ।

ईभी सेग्मेन्टमा टीभीएसले आफ्नो बलियो पकड प्रमाणित गरेको छ । कम्पनीले जुन महिनामा मात्रै ४८ हजार ५३७ युनिट विद्युतीय दुई–पांग्रे सवारी साधन बिक्री गर्दै आफ्नो अग्रतालाई अझ मजबुत बनाएको छ । यसको तुलनामा हिरो मोटोकर्पको ई–स्कुटर ब्रान्ड भीडाले २१ हजार ८१२ युनिट मात्र बिक्री गर्न सकेको छ, जुन टीभीएसको तुलनामा आधाभन्दा पनि कम हो ।