२०२६ को रण उत्सवमा टीभीएसको कस्टम बाइकले खिच्यो दर्शकको ध्यान

गुजरातमा आयोजित २०२६ को रण उत्सवमा टीभीएस मोटर कम्पनीले आफ्नो उपस्थितिलाई सामान्य प्रदर्शनीभन्दा फरक र विशेष बनाएको छ।

प्रदर्शनीको मुख्य आकर्षण इमोर कस्टम्ससँगको सहकार्यमा निर्माण गरिएका विशेष कस्टम मोटरसाइकलहरूको श्रृंखला बन्यो। यस परियोजनाअन्तर्गत कम्पनीका चार लोकप्रिय मोडल अपाचे आरआर ३१०, अपाचे आरटीआर ३१०, अपाचे आरटीआर २०० फोर भल्व र रोनिनलाई नयाँ डिजाइनका साथ प्रस्तुत गरिएको थियो।

सो मोटरसाइकलको डिजाइनको प्रेरणा कच्छको रणको सेतो नुनिलो मरुभूमि र नीलो आकाशबाट लिइएको हो। प्रत्येक मोटरसाइकलमा विशेष पेन्ट फिनिश र मरुभूमिको तीखो रङ्गीन विरोधाभास झल्काउने रङ संयोजन प्रयोग गरिएको छ। साथै विशेष धातु चिन्हले यी कस्टम संस्करणहरूलाई अन्य मोडलभन्दा फरक बनाएको छ।

डिजाइनमा व्यापक परिवर्तन गरिए पनि यी मोटरसाइकलको इन्जिन, फ्रेम र गियर सिस्टममा कुनै परिवर्तन गरिएको छैन।  यी मोटरसाइकलहरु मध्ये रोनिन मोडललाई  एक्सप्लोरेशन थीममा तयार पारिएको छ । यसमा ड्युअल पर्पस टायर, नयाँ फ्रन्ट मडगार्ड तथा मोड्युलर लगेज सिस्टम जडान गर्न मिल्ने बलियो रियर क्यारियर जस्ता विशेषता समावेश छ ।

२०२६ को रण उत्सवमा टीभीएस मोटर कम्पनीको प्रस्तुति मोटरसाइकल डिजाइन, सांस्कृतिक प्रेरणा र साहसिक अनुभवको संगमका रूपमा उभिएको छ, जसले सहभागी र दर्शक दुवैको ध्यान आकर्षित गर्न सफल भएको देखिन्छ।