भारतमा पहिलो पटक हिरोलाई पछि पा-यो टीभीएसले, होन्डा पहिलो नम्बरमा

भारतीय अटोमोबाइल उद्योगमा गत फेब्रुअरी महिना निकै नै रोचक रहेको छ । भारतको नम्बर वान मानिने हिरो मोटोकर्पको ताज खोसिएको छ । यति मात्र होइन, यो दोस्रो नभई तेस्रो स्थानमा झरेको छ भने होन्डा पहिलो र टीभीएस दोस्रो नम्बरमा रहन सफल भएका छन् ।

गत वर्षको यही समयको त्रैमासिक अवधिको तुलनामा यो वर्षको त्रैमासिकमा शतप्रतिशत बिक्री बढेको छ । घरेलु बजारका साथै एक्स्पोर्ट मार्केटले समेत यसमा भूमिका खेलेको छ । यसमा आईसीई इन्जिनका साथै इलेक्ट्रिक टु ह्विलरले समेत महत्वपूर्ण भूमिका खेलेको छ ।

फेब्रुअरी महिनामा होन्डाले ४ लाख २२ हजार ४४९ युनिट बिक्री गरेको छ भने टीभीएसले ४ लाख ३ हजार ९७६ र हिरोले ३ लाख ८८ हजार ६८ युनिट बिक्री गरेको छ । यो अवधिमा होन्डा र टीभीएसले गत वर्षको यही महिनाको तुलनामा क्रमशः ७.९, ९.६ प्रतिशत बिक्री बढाएका छन् भने हिरोको बिक्री १७.२ प्रतिशत घटेको छ ।

टीभीएसले पहिलो पटक मासिक बिक्रीका आधारमा हिरो मोटोकर्पलाई पछि पारेको छ । अन्य कम्पनीको बिक्रीमा यो महिना गिरावट आइरहेको समयमा टीभीएसको बिक्री भने ह्वात्तै बढेको छ । फेब्रुअरीमा टीभीएसको निर्यात २६ प्रतिशत बढेर १ लाख २४ हजार ९९३ पुगेको छ, जुन गत वर्षको यो महिनामा ९८ हजार ८५६ मात्र थियो । यसको इलेक्ट्रिक स्कुटर आईक्युबको बिक्री पनि ३४ प्रतिशत बढेर २४ हजार भन्दा बढी पुगेको छ ।

नेपाली बजारमा समेत यी तीनै ब्रान्डका सवारी साधन बिक्रीका लागि उपलब्ध छन् । भारत र नेपालको बजारमा समान भए पनि बिक्रीका आधारमा भने यहाँको अवस्था भारत भन्दा अलि फरक छ ।