नेपाली बजारमा आयो टीभीएस अपाचे आरटीआर १६० फोरभी बीएस६, मूल्य र फिचर यस्तो

काठमाडौं – नेपाली बजारमा टीभीएसको नयाँ बीएस६ इन्जिनयुक्त मोटरसाइकल अपाचे आरटीआर १६० फोरभी भित्रिएको छ । नेपालका लागि टीभीएसको आधिकारिक वितरक जगदम्बा मोटर्सले भृकुटीमण्डपमा आयोजना गरेको एक्सचेन्ज मेलामार्फत सो मोटरसाइकल सार्वजनिक गरेको हो ।

पहिले नेपाली बजारमा बीएस४ इन्जिनयुक्त मोटरसाइकल रहेकोमा अब बीएस६ इन्जिनयुक्त अपाचे आरटीआर १६० फोरभी भित्रिएको हो । यसको मूल्य ३ लाख ७९ हजार ९ सय रुपैयाँ तोकिएको छ । यो भन्दा पहिले नेपाली बजारमा उपलब्ध बीएस४ इन्जिनयुक्त मोटरसाइकलको मूल्य भने ३ लाख ३९ हजार ९ सय रुपैयाँ सम्ममा उपलब्ध छ ।

यो मोटरसाइकल एफआई इन्जिनयुक्त र सिंगल च्यानल एबीएस सहित उपलब्ध छ । त्यसैगरी यसलाई स्पोर्ट, अर्वान र रेन गरी तीन मोडमा चलाउन सकिन्छ । टीभीएसका अन्य मोडल जस्तै यसमा पनि स्मार्ट कनेक्ट फिचर उपलब्ध छ । यसको हेडलाइट पनि अन्य भन्दा फरक छ ।

यो मोटरसाइकलमा १५९.७ सीसीको फोर स्ट्रोक, फोर भल्व इन्जिन रहेको छ, जसले स्पोर्ट मोडमा १७.५ पीएस पावर र १४.७ एनएम टर्क जेनेरेट गर्छ । यसमा भएको ५–स्पिड गियरबक्सले पावरफुल राइडिङ अनुभव प्रदान गर्छ ।

टीभीएसले औपचारिक रुपमा यो मोटरसाइकल नेपाली बजारमा लन्च गर्न भने बाँकी नै छ ।