पहिलो पटक बीटीओ सिस्टम सहितको टीभीएस अपाचे आरआर ३१० आयो बजारमा

भारतमा टीभीएस अपाचे आरआर ३१० को २०२१ भर्सन लन्च भएको छ । यसको मूल्य भारतमा २ लाख ५९ हजार भारु तोकिएको छ ।

टीभीएसले सबैभन्दा पहिले अपाचे आरआर ३१० मोटरसाइकल सन् २०१७ मा लन्च गरेको थियो । त्यसपछि लगातार रुपमा यसमा विभिन्न अपडेट गरिएको छ । हाल यो मोटरसाइकलमा पहिलो पटक फ्याक्ट्री बिल्ट–टु–अर्डर (बीटीओ) सिस्टम दिइएको छ, जहाँ टीभीएस अराइभ एपको सहयोगले आफ्नो आवश्यकता अनुसार मोटरसाइकललाई स्पेसिफाई गर्न सकिन्छ । यसबाट आफ्नो यात्रालाई रियल टाइममा ट्रयाक गर्न सकिन्छ ।

बीटीओ सिस्टम अनुसार ग्राहकले मोटरसाइकल किन्दा नै प्रि–सेट किट, ग्राफिक अप्सन, रिम कलर अप्सन र पर्सनलाइज्ड रेस नम्बर छनोट गर्न सक्छन् । त्यही अनुसारको मोटरसाइकल कम्पनीले उपलब्ध गराउछ ।

यसका लागि डाइनामिक र रेस गरी दुई किट उपलब्ध हुनेछ । डाइनामिक किटमा प्रिलोड, रिबाउन्ड र कम्प्रेसन ड्याम्पिङ सहितको मल्टी–लेवल एड्जस्टमेन्ट भएको फुल्ली एड्जस्टेबल फ्रन्ट र रियर सस्पेन्सन उपलब्ध हुन्छ । त्यसैगरी रेस किटमा रेसिङका लागि आवश्यक कर्नरिङ र फुटरेस्ट लगायतका फिचर उपलब्ध हुन्छ ।

यो मोटरसाइकलमा ३१३ सीसीको इन्जिन छ, जसले ३४ बीएचपी पावर र २७.३ एनएम टर्क जेनेरेट गर्छ । यसको इन्जिन ६–स्पिड गियरबक्सयुक्त छ, जुन रेस ट्युन्ड स्लिपर क्लचका साथ आउछ ।

यसमा टीभीएसका अन्य मोटरसाइकलमा जस्तै ब्लुटुथ कनेक्टिभिटी र राइड बाई वायर फिचर दिइएको छ । त्यसैगरी यसलाई अर्बन, ट्रयाक, स्पोर्ट र रेन गरी चार राइडिङ मोडमा चलाउन सकिन्छ ।

यो मोटरसाइकलले केटीएम आरसी ३९० मोटरसाइकलसँग प्रतिस्पर्धा गर्नेछ । नेपाली बजारमा हाल उपलब्ध टीभीएस आरआर ३१० मोटरसाइकलको मूल्य ७ लाख ७९ हजार ९ सय रुपैयाँ छ । त्यसैगरी केटीएम आरसी ३९० को मूल्य ९ लाख ४४ हजार ९ सय रुपैयाँ छ । नयाँ भर्सनको अपाचे आरआर ३१० नेपाली बजारमा आयो भने यसको मूल्य अहिलेको अपाचे आरआर ३१० भन्दा बढी हुन सक्छ ।