ट्रायम्फ स्क्रयाम्बलर ४०० एक्ससीको बुकिङ खुला, मूल्य कति ?

काठमाडौं–ट्रायम्फ मोटरसाइकलको नेपालका लागि आधिकारिक वितरक हंसराज हुलासचन्द एण्ड कम्पनीले नेपाली बजारमा ट्रायम्फ स्क्रयाम्बलर ४०० एक्ससीको बुकिङ खुला गरेको छ ।

कम्पनीले आफ्नो फेसबुक पेजमार्फत नयाँ मोडलको बुकिङ खुला भएको र मूल्य ७ लाख ९९ हजार ९०० रुपैयाँ निर्धारण गरिएको जानकारी दिएको हो ।

कम्पनीले यसअघि ४०० स्पिड र ४०० स्क्र्याम्बलर बिक्री गर्दै आएकोमा नयाँ मोडल लन्च गर्न लागेको हो । नयाँ मोडल अबको केही दिनभित्रै लन्च गरिने कम्पनी स्रोतले बताएको छ ।

स्क्रयाम्बलर एक्ससीमा ट्रायम्फले फरक कस्मेटिक डिजाइन र सेग्मेन्टकै पहिलो नयाँ कलर अप्सन दिएको छ । बाइकमा क्रस स्पोक अलोय ह्विल र ट्युबलेस डबल पर्पस टायर जडान गरिएको छ ।

पावरट्रेनको कुरा गर्नुपर्दा बाइकमा ३९८ सीसीको सिंगल सिलिण्डर, लिक्विड कुल्ड, बीएस ६ इन्जिन जडान गरिएको छ । उक्त इन्जिनले अधिकतम ३९.५ पीएस पावर र ३७.५ एनएम टर्क जेनेरेट गर्दछ ।