असोज १ देखि बागमती प्रदेशमा पनि ७० अंक ल्याए ट्रायल पास हुने

काठमाडौं – आगामी असोज १ देखि बागमती प्रदेशमा पनि ट्रायलमा ७० अंक ल्याए पास हुने प्रणाली लागू हुने भएको छ । नेपाल सरकारले निर्देशिका जारी गरेको दुई वर्षपछि बागमती प्रदेशले स्मार्ट लाइसेन्सको ट्रायलमा अंकभार प्रणाली लागू गर्ने भएको हो ।

बागमती प्रदेशमा असोज १ गतेदेखि लाइसेन्सका लागि लिइने ट्रायल परीक्षामा अंकभार प्रणाली लागू गर्ने निर्णय भएको प्रदेशको श्रम, रोजगार तथा यातायात मन्त्रालयले बताएको छ ।

सोमबार संघीय भौतिक पूर्वाधार तथा यातायात मन्त्री मोहम्मद ईस्तियाक राईको नेतृत्वमा सातै प्रदेशका यातायात मन्त्री सहित बसेको बैठकले सवारी चालक अनुमतिपत्र परिक्षा निर्देशका २०७७ सबै प्रदेश कार्यालयहरुले अनिवार्य कार्यान्वयन गर्ने निर्णय गरेको निर्णय अनुसार बागमती प्रदेशमा पनि लागू हुने भएको हो ।

यसअघि प्रदेश १, गण्डकी, लुम्बिनी र सुदूरपश्चिम प्रदेशमा निर्देशिका लागू भइसकेको छ ।

मधेस, बागमती र कर्णाली प्रदेशले भने यो व्यवस्था कार्यान्वनमा ल्याउन सकेका थिएनन् । बागमती प्रदेश सरकारले नयाँ नियम भएका कारण आवश्यक तयारी पूरा नहुँदा कार्यान्वयन गर्न नसकिएको भन्दै आएको थियो ।

अब ट्रायलमा कुल १०० अंकभारमध्ये ७० अंकसम्म ल्याउने चालकले स्मार्ट लाइसेन्स पाउन सक्नेछन् ।