टोयोटाको सानो तर शक्तिशाली एसयूभी नयाँ ल्यान्ड क्रुजर एफजे सार्वजनिक

जापान मोबिलिटी शो २०२५ मा टोयोटाले आफ्नो चर्चित अफरोड एसयूभी ल्यान्ड क्रुजर एफजे पहिलोपटक पेश गरेको छ । नयाँ एफजे ल्यान्ड क्रुजर सिरिजको बलियो र अफरोड डीएनएको किफायती, सानो र आधुनिक प्याकेजमा प्रस्तुत हुनेछ। यसलाई पहिलोपटक २०२६ को मध्यतिर जापानमा लन्च गरिनेछ ।

आकारका हिसाबले ल्यान्ड क्रुजर एफजेको लम्बाइ ४,५७५ एमएम, चौडाइ १,८५५ एमएम, उचाइ १,९६० एमएम र ह्विलबेस २,५८० एमएम छ ।

डिजाइनमा एफजे पुरानो एफजे४० को रेट्रो स्टाइल र आधुनिक एसयूभी लुकको मिश्रणमा प्रस्तुत गरेको छ । सो एसयूभीको दुई फरक डिजाइन रहेको छ । एउटामा गोलाकार हेडलाइट छ, जसले क्लासिक एफजे४० लाई स्मरण गराउँछ भने अर्कोमा सी आकारको एलईडी हेडलाइट दिइएको छ ।

इन्टेरियरमा डिजिटल इन्स्ट्रयुमेन्ट क्लस्टर, ठुलो इन्फोटेनमेन्ट स्क्रिन, बलियो स्टेयरिङ ह्विल र फिजिकल क्लाइमेट कन्ट्रोल समावेश छ । साथै एडेप्टिभ क्रुज कन्ट्रोल, लेन–किप असिस्ट र प्रि–कोलिजन ब्रेकिङ जस्ता उन्नत सेफ्टी फिचर समावेश गरिएको छ ।

नयाँ एफजेमा २.७ लिटर २टीआर एफई पेट्रोल इन्जिन जडान गरिएको छ, जसले १६१ एचपी पावर र २४६ एनएमको टर्क उत्पादन गर्छ। सो इन्जिन ६ स्पिड अटोमेटिक गियरबक्स र पार्टटाइम फोर ह्विल ड्राइभ सिस्टमसँग जोडिनेछ। यसलाई टोयोटाको आईएमभी प्लेटफर्ममा बनाइनेछ । साथै भविष्यमा डिजेल तथा हाइब्रिड भेरिएन्टमा पनि लन्च गर्ने सम्भावना रहेको छ ।

ल्यान्ड क्रुजर एफजे लन्च गरियो भने, यसले महिन्द्रा थार रक्सका साथै अफरोड एसयूभीसँग प्रतिस्पर्धा गर्नेछ ।