टोयोटाको पहिलो इलेक्ट्रिक एसयूभी भारतमा लन्च हुँदै

टोयोटा मोटरले भारतमा आफ्नो पहिलो इलेक्ट्रिक एसयूभी आधिकारिक रूपमा लन्च गर्ने तयारी गरेको छ। यो टोयोटाको भारतमा पहिलो पूर्ण इलेक्ट्रिक एसयूभी हुनेछ ।

हालसम्म टोयोटाले नयाँ इलेक्ट्रिक एसयूभीको टिजर मात्र सार्वजनिक गरेको छ तर यसको प्राविधिक विवरणहरू खुलाएको छैन। यद्यपि, मिडिया रिपोर्टका अनुसार सो एसयूभीमा २ वटा ब्याट्री विकल्प उपलब्ध हुन सक्ने अनुमान गरिएको छ। यी ब्याट्री ४९ किलोवाट आवर र ६१ किलोवाट आवर क्षमताका हुन सक्ने बताइएको छ । सो ब्याट्री एक पटकको पूर्ण चार्जमा करिब ५०० देखि ५४३ किलोमिटरसम्मको रेन्ज प्रदान गर्न सक्ने अनुमान गरिएको छ।

टोयोटाको सो नयाँ इलेक्ट्रिक एसयूभीमा १०.२५ इन्चको टचस्क्रिन इन्फोटेनमेन्ट सिस्टम र १०.१ इन्चको डिजिटल इन्स्ट्रयुमेन्ट क्लस्टर उपलब्ध हुनेछ। साथै, एलईडी हेडल्याम्प र टेललाइट, प्यानोरामिक सनरुफ, ड्युअल टोन इन्टेरियर, १८ इन्चका अलोय ह्विल जस्ता प्रिमियम फिचर समावेश हुनेछ । सेफ्टीका लागि यसमा ७ वटा एयरब्याग, एबीएस, ईबीडी र एडास जस्ता एडभान्स्ड सेफ्टी फिचर पनि दिइने अपेक्षा गरिएको छ।

लन्चपछि टोयोटाको सो नयाँ इलेक्ट्रिक एसयूभीले भारतीय बजारमा एमजी विन्डसर ईभी, हुन्डाई क्रेटा इलेक्ट्रिक, मारुती ईभिटारा र टाटा कर्भ ईभीजस्ता इलेक्ट्रिक एसयूभीसँग प्रतिस्पर्धा गर्नेछ।