२०३० सम्म टोयोटाले भारतमा १५ नयाँ मोडल लन्च गर्ने, बजार हिस्सा १० प्रतिशत पुर्याउने

टोयोटाले भारतका लागि एक प्रमुख र आक्रामक योजना बनाएको छ । जसअन्गर्तत, २०३० सम्ममा १५ नयाँ मोडल लन्च गरिने योजना समावेश गरिएको छ ।

मिडिया रिपोर्ट अनुसार, कम्पनीले ल्यान्ड क्रूजर एफजेलाई भारतमै उत्पादन गर्ने योजना बनाएको छ । जुन २०२८ को अन्त्यमा लन्च गरिने जनाइएको छ । सो एसयुभीलाई टोयोटाले महाराष्ट्रको छत्रपति संभाजीनगर प्लान्टमा उत्पादन गर्ने तयारी अघि बढाएको छ भने यसको मूल्य ३० लाख भारु हाराहारी पर्ने अनुमान गरिएको छ ।

टोयोटाले अर्को एउटा किफायती पिकअप ट्रकको पनि योजना बनाएको छ, जुन हाइलक्सभन्दा सानो र सस्तो हुनेछ । कम्पनीका अनुसार, यो दक्षिणपूर्वी एशियाली बजारहरूमा बेचिने हाइलक्स च्याम्प जस्तै हुन सक्ने बताइएको छ ।

नयाँ मोडलको लन्चसंगै कम्पनीले भारतमा आफ्नो बजार हिस्सा १० प्रतिशत पुर्याउने लक्ष्य लिएको छ । टोयोटाले हाल भारतको कुल प्यासेन्जर कार बजारमा ८ प्रतिशत हाराहारी बजार हिस्सा ओगटेको छ ।

अमेरिका र चीनपछि भारत विश्वव्यापी रूपमा टोयोटाको लागि तेस्रो ठूलो बजार हो । गत वर्ष, कम्पनीले ३ लाख भन्दा बढी सवारी साधन बिक्री गरेको थियो । टोयोटाले भारतमा आफ्नो वार्षिक उत्पादन क्षमता १० लाख युनिटभन्दा बढीमा विस्तार गर्ने तयारी गरेको छ ।