पर्फमेन्स ब्रान्ड ‘रेसर’ अन्तर्गत थप मोडल ल्याउने तयारीमा टाटा

टाटा मोटर्सले आफ्नो पर्फमेन्स ब्रान्ड रेसर अन्तर्गत थप नयाँ मोडल विकास गर्ने भएको छ । गत महिना लन्च भएको आफ्नो ठूलो ह्याचब्याकको स्पोर्टी संस्करण अल्ट्रोज रेसर जस्तै अन्य मोडल पनि पर्फमेन्स ब्रान्डमा आउने कम्पनीले जनाएको हो ।

कार निर्माताले अब रेसर ब्रान्डलाई थप मोडलमा समेत विस्तार गर्ने तयारी थालेको छ । हुन्डाईले आफ्नो एन–लाइन सब ब्रान्डजस्तै टाटाले पनि रेसर सब ब्रान्डमा आफ्नो लाइनअप विस्तार गर्न लागेको हो ।

टाटा मोटर्सका एमडी शैलेश चन्द्रका अनुसार माग भए रेसर परफर्मेन्स ब्रान्ड उच्च क्षमता भएका ईभीहरूमा पनि विस्तार हुन सक्छ । ‘हामी अल्ट्रोजको इलेक्ट्रिक संस्करणमा काम गरिरहेका छौं । त्यसैले यो अल्ट्रोज रेसरको ईभी भर्सन पनि हुन सक्छ,’ उनले भने ।अल्ट्रोज रेसरले बजारमा पाउने प्रतिक्रियाका आधारमा यसको थप विस्तारबारे निर्णय लिइने उनले बताए ।

आफ्नो प्रतिस्पर्धी ब्रान्ड हुन्डाइले जसरी आई २०, क्रेटा र भन्युलाई एन–लाइन भर्सनमा उतारेको छ, त्यसैगरी टाटाले पनि आफ्ना केही लोकप्रिय मोडललाई रेसर सब ब्रान्डमा ल्याउने तयारी थालेको अनुमान गर्न सकिन्छ ।