३७.८ प्रतिशत हिस्सासहित ब्याट्री उत्पादनमा सीएटीएलको अग्रता, यी हुन् टप १० उत्पादक

काठमाडौं– बिद्युतिय सवारीमा प्रयोग हुने ब्याट्री उत्पादनमा सीएटीएलले आफ्नो अग्रता कायमै राखेको छ । वर्ष २०२४ को जनवरीदेखी जुनसम्म उत्पादन भएको ब्याट्रीमा सीएटीएलले ३७.८ प्रतिशत बजार हिस्सासहित अग्र स्थान हासिल गरेको दक्षिण कोरियाको मार्केट रिसर्चर एसएनईले जनाएको छ ।

उक्त रिसर्च संस्थाका अनुसार सीएटीएललाई पछ्याउँदै बीवाईडीले १५.८ प्रतिशत हिस्सा ओगटेको छ । यी दुबै ब्राण्ड चीनका हुन् । यसैगरी कोरियन उत्पादक एलजी इनर्जी सोलुसनले १२.९ प्रतिशत हिस्सासहित तेस्रो स्थान ओगट्दा कोरियाकै अर्को उत्पादक एसके अन चौथो स्थानमा रहेको छ । एसके अनको हिस्सा ४.८ प्रतिशत छ ।

पाँचौ स्थानमा चीनकै सीएएलवी रहँदा छैठौ स्थानमा कोरियन उत्पादक सामसुङले आफ्नो स्थान सुरक्षित गरेको छ । यी कम्पनीको बजार हिस्सा क्रमशः ४.६ ४.५ प्रतिशत छ । सातौ स्थानमा भने जापानको पानासोनिक कम्पनी रहेको छ । पानासोनिकले ४.४ प्रतिशत हिस्सा ओगट्छ ।

आँठौ, नवौ र दशौ स्थानमा चीनका तीन कम्पनी गोसन, एभ इनर्जी र सनवोडा छन् । यी कम्पनीको बजार हिस्सा क्रमशः २.५, २.१ र २ प्रतिशत छ । बाँकी ८.७ प्रतिशत हिस्सा भने अन्य ब्राण्डले लिएका छन् ।