यी हुन् मलेसियामा बिक्री हुने टप ५ कार ब्रान्ड : यस्तो छ नेपालसँगको व्यापारिक साइनो

हामी नेपाल र भारत तथा चीनको कार बजारको वारेमा धेरै चर्चा गर्छौ । नेपालको नजिक जोडिएकाले चीन र भारतको चर्चा हुनु स्वाभाविकै हो । अझै भारतसँग खुला सीमाना भएको र धेरै व्यापार हुने भएकाले भारतीय कार बजारको बढी चर्चा हुनु पनि स्वाभाविक हो ।

त्यसो भए मलेसियाको कार बजार कस्तो होला ? नेपाल भित्रिने मलेसियन ब्रान्डका कारको बजार मलेसियामा कस्तो होला ? कौतुहलता हुनु स्वभाविक हो ।

हालै मलेसियाको माइकार सर्चले सन् २०२३ मा भएको बिक्रीका आधारमा मलेसियाका टप ५ कार ब्रान्ड सार्वजनिक गरेको छ । यस अनुसार मलेसियामा सबैभन्दा धेरै बिक्री हुने कार ब्रान्ड पेरोडुवा हो । पेरोडुवाले यो वर्ष २ लाख ४ हजार २२९ कार बिक्री गरेको छ । इनोभेसन र बजेट फ्रेन्डलीनेसका लागि परिचित पेरोडुवाले मलेसियन ग्राहकको मन जितेको छ । कुनै समय यो ब्रान्ड नेपालमा पनि उपलब्ध थियो । अहिले पनि पेरोडुवा भिभा, माइभी आदि कार नेपाली सडकमा पनि कतै गुडेका देखिन्छन् । तर अहिले भने यो नेपाली बजारमा उपलब्ध छैन ।

दोस्रो नम्बरमा प्रोटोन रहेको छ । प्रोटोनले २०२३ मा १ लाख २ हजार ८ सय कार बिक्री गरेको छ । नेसनल प्राइड र टेक्नोलोजिकल एड्भान्समेन्टका लागि प्रोटोन परिचित छ । नेपाली बजारमा समेत प्रोटोन ब्रान्ड उपलब्ध छ । जगदम्बा मोटर्सले यो गाडी बिक्री–वितरण गरिरहेको छ ।

टोयोटा मलेसियन कार बजारमा तेस्रो नम्बरमा रहेको छ । टोयोटाले गत वर्ष ८३ हजार ८६ कार बिक्री गरेको छ । ड्युरेबल र फ्युल इफिसियन्ट गाडी खोज्ने मलेसियन ग्राहकको रोजाइमा टोयोटा पर्छ ।

स्टाइल र इफिसियन्सी चाहने ग्राहकको मन जितेर होन्डा चौथो नम्बरमा रहेको छ भने रोबस्ट एसयूभी र स्लिक सेडान रोज्नेका लागि मित्सुबिसी रोजाइ बनी पाँचौ नम्बरमा रहेको छ । यी दुई ब्रान्डले सन् २०२३ मा क्रमशः ४९ हजार ५२८ र १४ हजार ९७० कार बिक्री गरे ।

प्रस्तुत तथ्यांकका आधारमा मलेसियन ग्राहकहरु फरक फरक प्रकृतिका छन् भन्ने प्रमाणित हुन्छ । मलेसियन अटोमोटिभ उद्योग डाइनामिक नेचरको छ र यहाँ प्रतिस्पर्धा पनि छ । प्रत्येक ब्रान्डको अलग्गै बजार छ र उनीहरुका उत्पादनको प्रकृति पनि फरक छ ।

नेपाली बजारमा मलेसियन ब्रान्डले खासै राम्रो प्रगति गर्न सकेको पाइदैन । लामो समय सम्म नेमलिंक इन्टरनेसनलले बिक्री गरिरहेको पेरोडुवा ब्रान्ड हराए पनि पछिल्लो समयमा प्रोटोन ब्रान्ड भने उपलब्ध छ । प्रोटोनले पनि अपेक्षित सफलता हासिल गरेको पाइदैन ।

मलेसियामा प्रचलित अन्य अन्तर्राष्ट्रिय ब्रान्ड टोयोटा, होन्डा, मित्सुविसी आदि भने नेपाली बजारमा समेत उपलब्ध छन् ।