इतिहास : थ्री–प्वाइन्ट सिटबेल्टको पेटेन्ट हासिल भएको दिन

सन् १९६२ को जुलाई १० का दिन स्विडिस इन्जिनियर निल्स बोहलिनले थ्री–प्वाइन्ट सेफ्टी बेल्टका लागि अमेरिकी पेटेन्ट हासिल गरेका थिए । उक्त सिटबेल्टलाई ‘गाडीमा प्रयोग गर्न, विशेष गरी रोड भेइकल अर्थात सडकमा प्रयोग हुने गाडी’ का लागि स्वीकृत प्रदान गरिएको थियो ।

भल्वोले करिव ४ वर्ष पहिले बोहलिनलाई कम्पनीको पहिलो सेफ्टी इन्जिनियरको रुपमा भर्ना गरेको थियो । सो समयमा अटो रेसिङ भन्दा अन्य समयमा सेफ्टी बेल्ट कमै मात्र प्रयोग गरिन्थ्यो । कमन ल्याप बेल्ट सिस्टमको प्रयोग गरिने सो जमानामा दुर्घटनाको कारण आन्तरिक चोटपटक लाग्ने सम्भावना हुन्थ्यो ।

यही समस्याको समाधानका लागि बोहलिनले थ्री–प्वाइन्ट सिटबेल्टको डिजाइन गरेका थिए, जुन अहिले पनि प्रयोग गरिन्छ । यसको मुख्य फाइदा भनेको दुर्घटनाको समयमा पनि यसले शरीरको माथिल्लो वा तल्लो दुवै भागलाई बचाउछ ।

सन् १९७० पश्चात यो डिजाइनको सिट बेल्ट सबै सवारी साधनका लागि स्ट्यान्डर्ड बनाइयो । बोहलिनले पनि आफ्नो पेटेन्टको प्रयोग सबै अटोमोबाइल कम्पनीहरुले गर्न सक्ने अनुमति प्रदान गरे । यसले गर्दा आज विश्वभरका चालक र यात्रु दुवैका लागि यो सिटबेल्ट बरदान सावित भएको छ ।