अटो शोमा तीन नयाँ ब्रान्डका मिनीकार, मूल्य २० लाख देखि २६ लाखसम्म

काठमाडौं– भृकुटिमण्डपमा जारी नाडा अटो शो–२०२४ मा तीन नयाँ ब्रान्डले मिनीकार प्रदर्शन गरेका छन् । केई क्युट ०२, बिएडब्लु ब्रम्बी र एचईभी ३०० अटो शोको पहिलो दिन मंगलबार औपचारिक लन्च भएका हुन । यी कारको सुरुवाती मूल्य १९ लाख ९६ हजारदेखि २६ लाखसम्म निर्धारण गरिएको छ ।

लक्ष्मी ई–मोबिलिटीले बिक्री सुरु गरेको केई क्युट ०२ को मूल्य १९ लाख ९६ हजार रुपैँया तोकिएको छ भने यसको टप स्पेकलाई २२ लाख ९६ हजार रुपैयाँ पर्छ । त्यसैगरी, क्युट ४ को मूल्य २४ लाख ९६ हजार तोकिएको छ ।

क्युट ०२ मा २८.०८ किलोवाट पावर क्षमताको लिथियम आइरन फस्फेट ब्याट्री र ४० किलोवाट क्षमताको मोटर रहेको छ । यसको अधिकतम टर्क ११० एनएम छ । क्युट ०४ मा २८.०८ किलोवाट पावर क्षमताको लिथियम आइरन फस्फेट ब्याट्री र ४० किलोवाट क्षमताको मोटर रहेको छ । यसको अधिकतम टर्क ११० एनएम छ । फुल चार्जमा यसले २०० र ३०० किलोमिटर रेन्ज दिने दावी गरिएको छ ।

एलआरआर ग्रुपले ल्याएको ब्रम्बी कारको मूल्य २१ लाख ९० हजार तोकेको छ । कारमा १७.२८ किलोवाट आवरको ब्याट्री दिइएको छ । बीएडब्लूले ब्रम्बी ह्याचव्याकमा ३० किलोवाट पीकपावर भएको इलेक्ट्रिक मोटर दिएको छ । यसको रेटेड पावर १५ किलोवाट छ । एकपटकको फुल चार्जमा यसले २०५ किलोमिटर रेन्ज दिने दावी छ ।

एस क्युब इन्टरप्राइजेजले ल्याएको एचईभी ३०० को मूल्य २५ लाख ९९ हजार रुपैयाँ तोकिएको छ । यो कारमा ३२.५६ किलोवाट आवरको ब्याट्री प्याक र ३५ किलोवाट क्षमताको मोटर जडान गरेको छ । यसको पिक टर्क १२५ एनएम छ । यो कारले एकपटकको फुल चार्जमा ३३५ किलोमिटर रेन्ज दिने दावी गरिएको छ ।