नयाँ इलेक्ट्रिक मोटरसाइकल लन्च गर्ने तयारीमा तीन प्रतिष्ठित ब्रान्ड हिरो, होन्डा र बजाज

भारतमा इलेक्ट्रिक दुईपांग्रे सवारीसाधनको बजार तीव्र गतिमा विस्तार भइरहेको छ। हरेक वर्ष बिक्री बढ्दै गए पनि हालसम्म बजारमा इलेक्ट्रिक स्कुटरको दबदबा अत्यधिक देखिन्छ। उपलब्ध तथ्यांकअनुसार, कुल इलेक्ट्रिक दुईपांग्रे बिक्रीको ९५ प्रतिशतभन्दा बढी हिस्सा स्कुटरले ओगटेका छन्, जबकि इलेक्ट्रिक मोटरसाइकलको योगदान पाँच प्रतिशतभन्दा कम मात्र रहेको छ। यसले भारतमा इलेक्ट्रिक मोटरसाइकल सेग्मेन्ट अझै प्रारम्भिक चरणमै रहेको र मुख्यधारका मोडलहरूको अभाव रहेको स्पष्ट देखाउँछ। नेपाली बजार पनि लगभग यही अवस्थामा छ ।

यही अवस्थालाई अवसरका रूपमा हेर्दै हिरो, होन्डा र बजाज जस्ता प्रतिष्ठित परम्परागत ब्रान्डहरू अब इलेक्ट्रिक मोटरसाइकल बजारमा प्रवेश गर्ने तयारीमा जुटेका छन्। यी ब्रान्डहरूले फरक–फरक सेग्मेन्टलाई लक्षित गर्दै नयाँ इलेक्ट्रिक बाइक विकास गरिरहेका छन्।

हिरो भिडा युबीईएक्स

हिरो मोटोकर्पले हालै भारतमा भिडा युबीईएक्स इलेक्ट्रिक मोटरसाइकलको डिजाइन पेटेन्ट दर्ता गरेको छ। यो बाइक पहिलोपटक सन् २०२५ मा इटालीको मिलानमा सम्पन्न ईआईसीएमए मोटर शो मा सार्वजनिक गरिएको थियो। पेटेन्ट तस्बिरहरू हेर्दा भिडा युबीईएक्स लगभग उत्पादनका लागि तयार अवस्थामा देखिन्छ।

यो बाइक नियो–नेकेड हाइपरमोटो डिजाइनमा आधारित छ, जसलाई अल–टेरेन राइडिङका लागि विकास गरिएको बताइएको छ। आकर्षक स्ट्रीटफाइटर लुक, आक्रामक डिजाइन र सबै–एलईडी लाइटिङ यसको प्रमुख विशेषता हुन्। कन्सेप्ट मोडलमा देखिएका यूएसडी फ्रन्ट फोक्र्सलाई उत्पादन संस्करणमा सामान्य टेलिस्कोपिक सस्पेन्सनले प्रतिस्थापन गरेको छ।

भिडा युबीईएक्समा टीएफटी इन्स्ट्रयुमेन्ट क्लस्टर, अगाडि र पछाडि डिस्क ब्रेक, टर्न–बाइ–टर्न नेभिगेसन र मिड–माउन्टेड इलेक्ट्रिक मोटर जस्ता फिचरहरू रहने अपेक्षा गरिएको छ। यो इलेक्ट्रिक मोटरसाइकल २०२६ को अन्त्यतिर भारतीय बजारमा बिक्रीका लागि आउने सम्भावना रहेको छ।

होन्डाको इलेक्ट्रिक कम्युटर मोटरसाइकल

जापानी अटोमोबाइल कम्पनी होन्डाले पनि भारतीय बजारका लागि इन्ट्री–लेभल इलेक्ट्रिक कम्युटर मोटरसाइकल विकास गरिरहेको छ। हालै सार्वजनिक पेटेन्ट फाइलिङअनुसार, यो बाइक सरल र व्यावहारिक डिजाइनमा आधारित हुनेछ।

यसमा अगाडि र पछाडि ड्रम ब्रेक, टेलिस्कोपिक फ्रन्ट फोर्क, डुअल–शक रियर सस्पेन्सन, गोलो हेडल्याम्प र साधारण इन्स्ट्रयुमेन्ट प्यानल जस्ता आधारभूत फिचरहरू रहनेछन्। रोचक पक्ष के छ भने, इन्धन ट्यांकीको माथिल्लो भागमा अतिरिक्त डिस्प्ले स्क्रिन दिइनेछ, जसले ब्याट्री चार्जको अवस्था देखाउनेछ।

होन्डाको पेटेन्टअनुसार, यस इलेक्ट्रिक बाइकमा डिट्याचेबल ब्याट्री प्याक रहनेछ, जसलाई होन्डाका ब्याट्री स्वापिङ स्टेशनमा चार्ज भएको ब्याट्रीसँग साट्न सकिनेछ। होन्डाले यसअघि एक्टिभा ईः मा यही प्रविधि अपनाए पनि सो स्कुटर बजारमा सफल हुन सकेको थिएन।

हिरो भिडा भीएक्सजेड

हिरोको अर्को महत्वाकांक्षी परियोजना हो भिडा भीएक्सजेड अर्थात भिडा एक्स जिरो, जुन ईआईसीएमए २०२५ मा कन्सेप्ट मोडलका रूपमा प्रस्तुत गरिएको थियो। हालैका पेटेन्ट विवरणअनुसार, यो मोटरसाइकल अमेरिकास्थित जिरो मोटरसाइकलसँग सह–विकास गरिएको हो।

भिडा भीएक्सजेडमा एलईडी हेडल्याम्प र इन्डिकेटर, ५–स्पोक अलोय ह्विल, यूएसडी फ्रन्ट सस्पेन्सन, बेल्ट–ड्राइभ सिस्टम, पेटल डिस्क ब्रेक र मल्टिपल–राइड मोडसहितको डिजिटल इन्स्ट्रयुमेन्ट क्लस्टर जस्ता प्रिमियम फिचरहरू रहनेछन्। १७–इन्चका ह्विलमा चल्ने यो बाइकले जिरो मोटरसाइकलका विद्यमान मोडलबाट ब्याट्री प्याक सापटी लिने सम्भावना देखिएको छ। यसको आधिकारिक लन्च मिति भने अझै सार्वजनिक गरिएको छैन।

बजाजको इलेक्ट्रिक मोटरसाइकल

बजाज अटो पनि इलेक्ट्रिक मोटरसाइकल सेग्मेन्टमा प्रवेश गर्ने तयारीमा छ। सन् २०२५ नोभेम्बरमा सार्वजनिक जानकारीअनुसार, बजाजले नयाँ इलेक्ट्रिक मोटरसाइकल प्लेटफर्म विकास गरिरहेको छ, जसबाट भविष्यमा विभिन्न मोडलहरू ल्याइनेछन्।

बजाजको पहिलो इलेक्ट्रिक बाइकले हाल प्रचलनमा रहेको बजाज चेतक इलेक्ट्रिक स्कुटरबाट ब्याट्री प्याक र इलेक्ट्रिक मोटर जस्ता केही कम्पोनेन्टहरू प्रयोग गर्ने अपेक्षा गरिएको छ। यो बाइक पुणेस्थित कारखानामा उत्पादन भई भारतीय बजारसँगै अन्तर्राष्ट्रिय बजारमा पनि निर्यात गरिनेछ।

यी सबै गतिविधिले आगामी वर्षहरूमा भारतको इलेक्ट्रिक मोटरसाइकल बजारमा ठूलो परिवर्तन र प्रतिस्पर्धा आउने संकेत गरेको छ। यसको प्रत्यक्ष असर नेपालमा पनि पर्नेछ । नेपालमा पनि यी तीनै ब्रान्ड राम्रो बिक्री हुने ब्रान्डमा गनिन्छन् ।