नेपालमै एसेम्बल भएका हिरोका ३ मोटरसाइकल र १ स्कुटरका साथ नेपाली बजार प्रवेश गर्दै सीजी मोटर्स

काठमाडौं – सीजी मोटर्सले नेपालमै एसेम्बल भएका ३ मोडलका मोटरसाइकल र एउटा स्कुटर नेपाली बजारका लागि सार्वजनिक गर्ने तयारी गरेको छ । पहिले हिरोको आधिकारिक वितरक नेपाल जनरल मार्केटिङ कम्पनी भएकोमा केही समय यता चौधरी ग्रुप अन्तर्गतको सीजी मोटर्स हिरोको आधिकारिक वितरक बनेको छ ।

सीजी मोटर्सले अर्को साता नेपाली बजारका लागि हिरो स्प्लेन्डर, स्प्लेन्डर प्लस र एक्सपल्स २०० मोटरसाइकल लन्च गर्ने बताएको छ । त्यसैगरी नेपाली बजारका लागि नयाँ स्कुटरको रुपमा हिरो जुम पनि लन्च गरिने छ ।

यी चार मोडलका साथ नेपाली बजारमा पहिलो पटक प्रस्तुत हुने सीजी मोटर्सको तयारी छ । यी मोटरसाइकल र स्कुटर नेपालमै एसेम्बल भएका हुने छन् ।

सीजी मोटर्सको एसेम्बल प्लान्ट नवलपरासीमा सुरुवात गरिएको छ । हिजो मात्रै चौधरी ग्रुपका अध्यक्ष विनोद चौधरीको जन्म दिनको अवसरमा सीजी फ्युचर फ्याक्ट्रीको सुरुवात गरिएको औपचारिक जानकारी उनको छोरा निर्वाण चौधरीले सार्वजनिक गरेका थिए ।

नवलपरासीमा रहेको सीजी इन्डष्ट्रियल पार्क क्षेत्रमा एसेम्बली प्लान्ट निर्माण भएको छ। ४ बिघा, १६ कट्ठा, १० धुर जग्गामा हिरोका मोटरसाइकल र स्कुटर एसेम्बल गरिने छ ।

वार्षिक ३० हजार मोटरसाइकल र स्कुटर उत्पादन गरिने र १६५ जनाले यहाँ रोजगारी पाउने छन् ।