२८ लाख गाडी फिर्ता बोलाउँदै फक्सवागन, स्टेयरिङ प्रणालीमा देखियो गम्भीर खराबी

काठमाडौं–जर्मन कार निर्माता कम्पनी फक्सवागनले विश्वभरका करिब २८ लाख ६० हजार सवारी साधनहरू फिर्ता (रिकल) बोलाउने घोषणा गरेको छ ।

स्टेयरिङ प्रणालीमा देखिन सक्ने प्राविधिक खराबी र त्यसले सिर्जना गर्न सक्ने दुर्घटनाको जोखिमलाई ध्यानमा राख्दै जर्मनीको संघिय मोटर यातायात प्राधिकरणको समन्वयमा यो कदम चालिएको हो ।

यस समस्याअन्तर्गत स्टेयरिङ प्रणालीका बोल्टहरूमा खिया लाग्ने र ती भाँचिन सक्ने जोखिम देखिएको छ । स्टेयरिङ गियरको बोल्ट भाँचिएमा सवारी चालकले गाडीको नियन्त्रण गुमाउन सक्ने र दुर्घटनाको सम्भावना बढ्ने बताइएको छ ।

यो समस्या विशेष गरी सन् २०१३ सेप्टेम्बर २४ देखि २०२४ जुलाई १ को बीचमा उत्पादन भएका फक्सवागनका गल्फ, टिगुआन, टुरान, क्याडी तथा औडीको क्यू३ मोडलका गाडीहरूमा फेला परेको हो ।

कम्पनीका अनुसार विश्वभर फक्सवागनका झन्डै २१ लाख ६० हजार र औडीका ६ लाख ९६ हजारभन्दा बढी गाडीहरू यसबाट प्रभावित भएका छन् ।