टेस्लाको भारत प्रवेश ! हरेक वर्ष ५ लाख इलेक्ट्रिक कार उत्पादन गर्ने, २० लाख मूल्य हुने

लामो समयदेखि भारतमा टेस्ला इलेक्ट्रिक कार लन्च गर्ने विषयमा छलफल भइरहेको थियो । तर यसमा कुनै सफलता पाएको थिएन । अहिले एलन मस्कको टोलीले यस विषयमा भारत सरकारसँग फेरि छलफल सुरु गरेकोे खबर सार्वजनिक भएको छ ।

यसपटक टेस्लाका प्रतिनिधिले ठोस प्रस्ताव ल्याएका छन् र कम्पनीले हरेक वर्ष ५ लाख इलेक्ट्रिक कार उत्पादन गर्ने कारखाना स्थापना गर्न सरकारसँग प्रस्ताव राखेका छन् ।

रिपोर्टका अनुसार टेस्लाले भारतमा २० लाख भारु मूल्यमा टेस्लाको कार लन्च गर्ने प्रस्ताव अघि सारेको छ । यद्यपि यो इलेक्ट्रिक कारको प्रारम्भिक मूल्य हुनेछ ।

टाइम्स अफ इन्डियाको रिपोर्टका अनुसार टेस्लाको चीनमा उल्लेखनीय उपस्थिति पछि अब भारतमा पनि आफ्नो उपस्थिति बलियो बनाउन सक्नेछ ।

टेस्ला यस पटक भारतमा सकारात्मक नतिजा ल्याउनेमा विश्वस्त देखिन्छ । यसको लागि टेस्ला र भारतीय वाणिज्य तथा उद्योग मन्त्रालयसँग वार्ता भइरहेको छ । यद्यपि टेस्ला भारत आउँदै गरेको सम्बन्धमा सरकार र कम्पनीले कुनै आधिकारिक बयान वा घोषणा भने गरेका छैनन् ।