मूल्य कम गरेर प्रतिस्पर्धीलाई दवाव दिँदै टेस्ला, अमेरिकामा २० प्रतिशतसम्मले घट्यो मूल्य

अमेरिकी इभी निर्माता टेस्लाले पछिल्लो समय कारको मूल्य घटाउन थालेको छ । केही समयअघि सम्म इलेक्ट्रिक कार सेग्मेन्टमा एकलौटी जस्तै बजार लिएको टेस्लामाथी विवाइडी जस्ता उदीयमान व्राण्डले चुनौती दिन थालेपछि प्रतिस्पर्धामा उत्रन उसले मूल्य कम गर्नु परेको हो । जसलाई यसका सिइओ एलन मस्कले समेत पुष्टि गरेका छन् ।

टेस्लाले आफ्नो दोस्रो ठूलो बजार चीनमा १३ देखी २४ प्रतिशतसम्म मूल्य कम गरेको एक हप्ता नवित्दै गत विहिवार अमेरीकी बजारमा ६ देखी २० प्रतिशत सम्मले मूल्य कम गरेको हो । अमेरिका टेस्लाको सवैभन्दा ठूलो बजार रहँदै आएको छ । सर्बाधिक बिक्री हुने कार मोडल३ र मोडल वाईमा उसले मुल्य कम गर्न थालेको हो ।

यसअघि उसले दक्षिण कोरिया, जापान, अस्ट्रेलिया र सिंगापुरमा मूल्य घटाएको थियो । मुनाफा कम राखेर बिक्री बढाउने रणनिती अनुरुप टेस्लामा भारी दरले मूल्य कम गरेको सिइओ मस्कले अन्तराष्ट्रिय मिडियालाई वताएका छन् । उनका अनुसार आगमी दिनमा आफ्नो दवदवा कायमै राख्न कम्पनीले सवै प्रकारका उपायहरु अवलम्वन गर्नेछ ।

मूल्य कम गरेपनि अन्य प्रतिस्पर्धी व्राण्डको तुलनामा अझैपनि यो व्राण्ड महंगो हुने भएपनि यसले अन्य प्रतिस्पर्धी व्राण्डलाई दवाव भने सिर्जना गरेको छ । टेस्लाले अहिले चीनमा विवाइडीसंग कडा प्रतिस्पर्धा गरिरहको छ भने यूरोप र अमेरिकी बजारमा उसलाई हुन्डाई, विएमडव्लू र फक्सवागन जस्ता व्राण्डले चुनौती दिन थालेका छन् ।