टाटा मोटर्सले इटालियन ट्रक निर्माता इभेकोलाई अधिग्रहण गर्ने, ४.५ अर्ब डलरमा सम्झौता हुँदै

टाटा मोटर्सले इटालियन ट्रक निर्माता इभेकोलाई खरिद गर्ने भएको छ । ४.५ अर्ब डलरको यो सम्झौता भारतीय अटोमोबाइल क्षेत्रमै कोरस पछिको दोस्रो ठूलो अधिग्रहण भएको बताइएको छ ।

मिडिया रिपोर्टका अनुसार, यस सम्झौतालई अन्तिम रुप दिन टाटा मोटर्स र इभेकले आज बोर्ड बैठक गर्दैछन् । टाटा मोटर्सले एग्नेली परिवारको लगानी रहेको कम्पनी एक्सोरबाट २७.१ प्रतिशत सेयर किन्ने तयारी गरेको हो ।

इभेकोले हालै कम्पनीलाई बचाउन आफ्ना व्यावसायिक यूनिटलाई अलग–अलग रुपमा बिक्री गर्ने योजनाको पुष्टि गरेको थियो । यसका लागि उसले विभिन्न पक्षहरूसँग निरन्तर बार्ता गर्दै आएको थियो ।

‘कम्पनीको निर्देशक बोर्ड यी सम्भावित लेनदेनहरूको सबै पक्षहरूको सावधानीपूर्वक समीक्षा र मूल्याङ्कन गर्ने प्रक्रियामा छ,’ कम्पनीद्वारा जारी विज्ञप्तिमा उल्लेख गरिएको छ ।

सम्भावित अधिग्रहणबारे समाचार बाहिरिएसँगै इभेकोको शेयर मंगलबार ७.४ प्रतिशतले बढेको थियो । यद्यपि, बीएसईमा टाटा मोटर्सको शेयर मूल्य भने ३.९ प्रतिशतले घटेर ६६५.४५ भारुमा झरेको छ ।