नयाँ फ्रन्ट फेसियाका साथ आउँदै टियागो ईभी

टाटाको लोकप्रिय ह्याचब्याक कार टियागो ईभी अपग्रेड भएर आउने मिति नजिकिँदै गएको छ । टाटा मोटर्सले हाल यसको सडक परीक्षण गरिरहेको छ र परीक्षणका दौरान यसका स्पाई तस्विरहरु बाहिर आइरहेका छन् । तर, यसपटक अनलाइनमा यसको तस्विर अलि फरक देखिएको छ ।

भारी क्यामफ्लाजले नयाँ फ्रन्ट फेसिया लुकाएको देखिएपनि इलेक्ट्रिक ह्याचब्याकमा ब्ल्याङ्क्ड–अफ ग्रिल र नयाँ फ्रन्ट बम्परको साथ पुनः डिजाइन गरिएको नोज सेक्सन पाउने सम्भावना देखाएको छ । यसमा नयाँ र शार्प देखिने एलईडी हेडल्याम्प राखिएका छन । साथै, कारको पछाडि केही कस्मेटिक अपडेट समेत गरिएको छ ।

इन्टेरियरको कुरा गर्नुपर्दा यस ह्याचब्याक कारमा पहिलेभन्दा केही ठूलो टचस्क्रिन इन्फोटेनमेन्ट सिस्टम, उज्यालो टाटा लोगो भएको २–स्पोक स्टेयरिङ ह्विल र नयाँ डिजिटल इन्स्ट्रयुमेन्ट क्लस्टर पाउन सक्ने अनुमान गरिएको छ ।

टियागो फेसलिफ्टमा पहिलेजस्तै १९.२ र २४ किलोवाट आवर क्षमताको ब्याट्री विकल्प उपलब्ध हुने अपेक्षा गरिएको छ । यस कारले एकपटकको फुल चार्जमा ३१५ किलोमिटर रेन्ज दिने दाबी गरिएको छ ।