टाटा नेक्सनको लोकप्रियता घट्दो, बिक्रीमा पन्च अगाडी

टाटाको सर्बाधिक सफल एसयुभीका रुपमा परिचित नेक्सनको लोकप्रियता पछिल्लो समय घट्न थालेको छ । लामो समयदेखी भारतको नम्वर १ एसयुभी रहँदै आएको नेक्सनलाई टाटाकै नयाँ माइक्रो एसयुभी पन्चले पछि पारेर उसको ताज खोसिदिएको छ ।

पेट्रोलियम र इलेक्ट्रिक दुबै भर्सनमा उपलब्ध यी दुई एसयुभी टाटाको लाइनअपमा सर्बाधिक बिक्री हुने मोडल हुन् । पछिल्लो २ महिनाको बिक्रीलाई हेर्दा पन्चले नेक्सनलाई पछि पार्दै लगेको छ । गत जनवरीमा भारतमा १७ हजार १८२ यूनिट नेक्सन बिक्री भएकोमा फेब्रुअरीमा घटेर १४ हजार ३९५ यूनिटमा सिमित हुँदा बजार १६.२२ प्रतिशतले गुमेको छ । उता पन्चको बिक्री भने निरन्तर उकालो लागिरहेको देखिन्छ ।

गत जनवरीमा कुल १७ हजार ९७८ यूनिट पन्च बिक्री भएकोमा फेब्रुअरीमा २.५६ प्रतिशतले बृद्धि भई १८ हजार ४३८ यूनिट पुगेको छ । जनवरी र फेब्रुअरी दुबै महिनामा पन्चले नेक्सनलाई पछि मात्रै पारेको छैन अन्य एसयुभी मोडल सुजुकी ब्रेजा र हुन्डाई क्रेटालाई समेत पछि पारेर नम्वर–१ एसयूभी बन्न सफल भएको छ ।

अघिल्लो वर्षको सोही महिनाको तुलनामा पन्चको बिक्री ६५ प्रतिशतले बृद्धि हुँदा नेक्सनको ३.४६ प्रतिशतले मात्र बृद्धि भएको छ । गत बर्षको फेब्रुअरी महिनामा टाटाले कुल ११ हजार १६९ यूनिट पन्च बिक्री गरेकोमा यस वर्षको सोही महिनामा बढेर १८ हजार ४३८ यूनिट पुगेको हो । उता नेक्सनको भने १३ हजार ९१४ यूनिटमा झिनो बृद्धि भई १४ हजार ३९५ यूनिट पुगेको छ ।

भारतमा जस्तै नेपाली बजारमा पनि नेक्सनको बिक्री निरन्तर ओरालो लाग्दै गएको छ । लन्च भएको सुरुवाती समयमा एकछत्र जस्तै बजार लिएको यसको ईभी भर्सनले हाल छिटपुट बजार लिएपनि कम्वसन इन्जिनको बिक्रीे केही यूनिटमा सिमित भएको छ । चिनियाँ ब्राण्डका ईभीको लोकप्रियता बढ्न थालेपछि नेक्सन ईभीको बिक्री नराम्रोसंग प्रभावित बन्न पुगेको हो ।

भारतमा निकै राम्रो बिक्री हाँसिल गरेको पन्चको कम्वसन भर्सन नेपाली बजारमा उपलब्ध भएपनि यसले बजार लिन सकिरहेको छैन । अर्कोतर्फ ईभीको बजार चिनियाँ ब्राण्डको कब्जामा गएका कारण टाटा मोटर्सको नेपालका लागि आधिकारिक वितरक सिप्रदी ट्रेडिङले पन्च ईभीलाई तत्कालै लन्च गरिहाल्ने मनस्थिती बनाएको देखिँदैन ।