नेक्सन फेसलिफ्टमा हुनेछन् यी नयाँ फिचर, अर्को महिना लन्च हुने

टाटा मोटर्सले आफ्नो सर्बाधिक सफल एसयूभी नेक्सनको फेसलिफ्ट ल्याउने तयारीलाई तिव्र बनाएको छ । अर्को महिना लन्च हुने अनुमान गरिएको सो एसयूभीमा थप हुन लागेका नयाँ फिचरलाई कम्पनीले सार्वजनिक गरेको छ । नेक्सन फेसलिफ्टमा मुख्यतः ३६० डिग्री क्यामेरा, नयाँ एलइडी डिआरएल र फ्रन्ट पार्किङ सेन्सल लगायत फिचर थप हुने कम्पनीले जनाएको छ ।

सो एसयूभीको फेसलिफ्टलाई कम्पनीले १० भन्दा वढी ट्रिममा उपलब्ध गराउने अनुमान गरिएको छ । हाल उपलब्ध नेक्सन ६ ट्रिममा बिक्री हुँदै आएको छ भने रेगुलर मोडलसहित यसको ४ स्पेसल एडिसन बजारमा उपलब्ध छ । कम्पनीले यसको डार्क, काजिराङ्गा, जेट र रेड डार्क नाममा स्पेसल एडिसन बिक्री गर्दै आएकोमा फेसलिफ्ट पनि यी एडिसनमा उपलब्ध हुनसक्ने संभावना देखिएको छ ।

नेक्सन फेसलिफ्टमा ह्यारियर र सफारीमा जस्तै दुईवटा १०.२५ इन्चको टचस्क्रिन र डिजिटल इन्स्ट्रयूमेन्ट क्लस्टर उपलब्ध हुनेछन् । यसैगरी नयाँ टु स्पोक स्टेरिङ ह्विल, सवै भेरिएन्टमा न्यूनतम ६ वटा एयरव्याग, एलइडी डिआरएलसहितको एलइडी हेडल्याम्प र मल्टि ड्राइभ मोड लगायत फिचर दिन लागिएको कम्पनीले जनाएको छ ।