टाटा नेक्सनद्वारा ७ वर्षमा ७ लाख युनिट बिक्रीको आँकडा पार

टाटा मोटर्सले नेक्सन एसयूभी ७ वर्षभित्र ७ लाख युनिट बिक्रीको आँकडा पार गरेको घोषणा गरेको छ । टाटा नेक्सन सन् २०१७ मा लन्च गरिएको थियो । नेक्सन सन् २०२१ र २०२३ बिच लगातार तीन वर्षसम्म भारतको सबैभन्दा धेरै बिक्री हुने एसयूभीको उपाधि हासिल गरेको थियो ।

नेक्सनले २०१८ मा जीएनक्याप क्र्यास टेस्टमा ५ स्टार सेफ्टी रेटिङ पाएको थियो । फेब्रुअरी २०२४ मा पनि अपडेट गरिएको नेक्सनले ५ स्टार जीएनक्याप रेटिङ हासिल गरेको थियो । हालै नेक्सन ईभीले पनि पूर्ण अंक प्राप्त गरेको छ ।

पेट्रोल, डिजेल र इलेक्ट्रिक जस्ता विभिन्न पावरट्रेनमा उपलब्ध टाटा नेक्सनले समयसँगै आफ्नो स्थिति बलियो बनाएको छ। टाटा नेक्सनले पछिल्ला २ वर्षमा ३ लाखभन्दा बढी युनिट बिक्री गरेको छ ।

टाटा नेक्सन लन्च भएको २५ महिना भित्र १ लाख युनिट बिक्री गरेको थियो । त्यसको २० महिना भित्र टाटाले कुल २ लाख नेक्सन बिक्री गरेको थियो ।

मार्च २०२२ र अक्टोबर २०२२ मा ३ र ४ लाख युनिट बिक्री भएको थियो। डिसेम्बर २०२३ सम्ममा नेक्सनको बिक्री सङ्ख्या ६ लाख युनिट पुगिसकेको थियो । यसको गतिलाई अगाडि बढाउँदै टाटाले अर्को ७ महिना भित्र ७ लाख बिक्रीको कोसेढुङ्गा हासिल गरेको छ ।