टाटा मोटर्सद्वारा २०२६ मा तीन नयाँ मोडल ल्याउने तयारी

टाटा मोटर्सले सन् २०२६ मा तीन नयाँ इलेक्ट्रिक कार बजारमा ल्याउने तयारी गरेको छ। कम्पनीले हालै लन्च गरेको नयाँ पन्च ईभीपछि अब टियागो ईभीको फेसलिफ्ट संस्करण, प्रिमियम अभिन्या र सिएरा ईभी ल्याउने योजना बनाएको हो ।

कम्पनीको सबैभन्दा किफायती इलेक्ट्रिक कारका रूपमा चिनिएको टाटा टियागो ईभी नयाँ अवतारमा आउने तयारीमा छ। फेसलिफ्ट मोडल हालै परीक्षणका क्रममा देखिएको छ। नयाँ संस्करणको एक्टेरियर डिजाइनमा नयाँ एलईडी हेडलाइट, आकर्षक डे टाइम रनिङ लाइट, नयाँ बम्पर जस्ता परिवर्तन देखिन सक्नेछ । साथै, पहिलोपटक ३६० डिग्री क्यामेरा र सनरुफजस्ता सुविधा समावेश हुन सक्ने चर्चा छ।

यसको इन्टेरियरमा ठुलो टचस्क्रिन डिस्प्ले र नयाँ स्टेयरिङ ह्विल उपलब्ध गराइने अपेक्षा गरिएको छ। ब्याट्री क्षमतामा पनि सुधार भई करिब ३० किलोवाट आवरसम्मको ठुलो ब्याट्री प्रयोग हुन सक्ने अनुमान गरिएको छ ।

यसैबीच, टाटाको प्रिमियम सब-ब्रान्ड अभिन्या अन्तर्गत पहिलो कार पनि सन् २०२६ को अन्त्यसम्म लन्च हुने तयारीमा छ । कम्पनीका हालका मोडलभन्दा महँगो र फरक पहिचान बनाउने लक्ष्यसहित सो गाडी निर्माण भइरहेको छ। सो गाडी जागुआर ल्याण्ड रोभरको विशेष ईएमए प्लेटफर्ममा आधारित हुनेछ। स्पोर्टब्याक शैलीको डिजाइनका कारण यसको डिजाइन निकै आकर्षक हुने अपेक्षा गरिएको छ।

त्यसैगरी, टाटा सिएरा ईभी पनि सन् २०२६ को अप्रिलदेखि जुन अवधिमा लन्च हुन सक्ने अनुमान गरिएको छ । कम्पनीले यसअघि सिएराको पेट्रोल तथा डिजेल संस्करण ल्याइसकेको छ र अब त्यसको इलेक्ट्रिक संस्करण ल्याउने तयारीमा छ। सिएरा ईभीमा दुई वा तीनवटा ब्याट्री विकल्प उपलब्ध हुन सक्नेछ । यसले एकपटक फुल चार्ज गर्दा ४५० देखि ५०० किलोमिटरभन्दा बढी रेन्ज तय गर्न सक्ने अपेक्षा गरिएको छ। डिजाइनका हिसाबले यो पेट्रोल तथा डिजेल सिएरासँग मिल्दोजुल्दो भए पनि यसमा केही परिवर्तन गरिने अनुमान गरिएको छ ।