फूल चार्जमा ५०० किमी सम्मको रेन्ज दिने सिएराको इलेक्ट्रिक भर्सन लन्च गर्दै टाटा

टाटाले आफ्नो सिएरा ईभी एसयूभीको लन्चिङ मिति सार्वजनिक गरेको छ । मिडिया रिपोर्टका अनुसार कम्पनीले सो ईभी सन् २०२६ मा लन्च गर्ने सम्भावना छ । कम्पनीले सिएरालाई इलेक्ट्रिक अवतारमा लन्च गर्नेछ र यो ५ डोर एसयूभी हुनेछ ।

कम्पनीले ३ डोर भएको सिएरा सन् २००० मा लन्च गरेको थियो । कम्पनीले अटो एक्सपो २०२० मा पहिलो पटक सिएरा ईभीको कन्सेप्ट सार्वजनिक गरेको थियो । त्यसपछि अटो एक्स्पो २०२३ दोस्रो कन्सेप्ट सार्वजनिक गरेको थियो ।

टाटा सिएरा ईभीमा पछाडिको सिट हटाएर सिट बढाउन मिल्ने विकल्पको हुनेछ । सो कार एडभान्स ड्राइभर असिस्टेन्स सिस्टम र हिल होल्ड असिस्टको साथमा आउनेछ । यसमा टचस्क्रिन इन्फोटेनमेन्ट सिस्टम, डिजिटल इन्स्ट्रयुमेन्ट क्लस्टर, पुश स्टार्ट एण्ड स्टप बटन, क्रुज कन्ट्रोल, अगाडि चार्जिङ पोइन्ट र मस्कुलर लुक्स हुनेछ । साथै ड्राइभर क्याबिन र पछाडि दुवैमा एयरब्याग जडान गरिनेछ।

रिपोर्टका अनुसार टाटा सिएरा ईभीको लम्बाइ ४१५० एमएम, चौडाइ १८२० एमएम र उचाई १६७५ एमएम हुनेछ । कारको ह्विलबेस २४५० एमएम हुनेछ । सो कारले एक पटक चार्ज गरेपछि ५०० किलोमिटरसम्मको रेन्ज प्रदान गर्नेछ । सो एसयूभी एक्टीलेभ प्लेटफर्ममा आधारित हुनेछ। इलेक्ट्रिक सिएरा, ९० को दशकको सिएरा जस्तै हुन सक्ने अनुमान गरिएको छ ।

सो एसयूभीमा पाँच र सात सिटको विकल्प हुनेछ । यो कारको प्रारम्भिक मूल्य २५ देखि ३० लाख भारुसम्म हुने अनुमान पनि गरिएको छ ।