टाटा मोटर्सको नयाँ डिजिटल पहिचान, ‘टाटा.कार्स’ सँगै फेरियो ब्रान्डको स्वरूप

काठमाडौं–टाटा मोटर्सले आफ्नो प्यासेन्जर कार व्यवसायका लागि नयाँ विश्वव्यापी ब्रान्ड पहिचान ‘टाटा.कार्स’ सार्वजनिक गरेको छ ।

कम्पनीले आफ्ना सम्पूर्ण पेट्रोल, डिजेल तथा इलेक्ट्रिक कारको पोर्टफोलियोलाई एउटै एकीकृत ब्रान्डको छातामुनि ल्याउने उद्देश्यले यो कदम चालेको हो ।

टाटा मोटर्सका प्रबन्ध निर्देशक तथा सीईओ शैलेश चन्द्रका अनुसार यो केवल नयाँ ब्रान्ड पहिचान मात्र नभई भविष्यप्रतिको कम्पनीको स्पष्ट सोच र प्रतिबद्धताको घोषणा हो ।

डिजाइनका हिसाबले टाटाको प्रसिद्ध ‘टी’ लोगो र सडकका रेखाहरूको ज्यामितिबाट प्रेरित भएर ‘प्यारलल पाथवेज’ नामक नयाँ भिजुअल अवधारणा तयार पारिएको छ ।

यसमा ब्रान्डको परम्परागत नीलो रङलाई परिमार्जन गर्दै नयाँ ‘एम्बिसन ब्लु’ रङ समावेश गरिएको छ । यो नयाँ ब्रान्डिङ कम्पनीका डिजिटल प्लेटफर्म, सोरुम, सर्भिस सेन्टर तथा आधिकारिक सञ्चार माध्यमहरूमा लागू गरिने जनाइएको छ ।

नयाँ पहिचान प्रयोगमा आए पनि कम्पनीको दर्ता मानिएको कानुनी नाम भने साविक बमोजिम नै यथावत रहने बताइएको छ ।