आफ्नो पहिलो इलेक्ट्रिक स्कुटर ई-एक्सेस लन्च गर्ने तयारीमा सुजुकी

सुजुकीले आफ्नो पहिलो इलेक्ट्रिक स्कुटर ई-एक्सेस लन्च गर्ने भएको छ । सो स्कुटरलाई पहिलोपटक अटो एक्स्पो २०२५ मा सार्वजनिक गरिएको थियो । कम्पनीले यसलाई आफ्नो नयाँ ई-टेक्नोलोजी अन्तर्गत विकास गरेको बताएको छ ।

ई-एक्सेसमा लिथियम आइरन फस्फेट ब्याट्री प्रयोग गरिएको छ, जसलाई पानी, तापक्रम, झटका, दबाब र पङ्चरजस्ता विभिन्न कठोर परीक्षणमा सफलता मिलेको छ। स्कुटरमा एसडीएमएस-ई ड्राइभिङ सिस्टम छ, जसमा इको मोड, राइड मोड ए, राइड मोड बी र रिभर्स मोड समावेश छ । यसमा रिजेनेरेटिभ ब्रेकिङ सुविधा रहेको छ, जुन बेल्ट-ड्राइभ सिस्टममार्फत पावर पछाडिको पाङ्ग्रामा पठाउँछ।

स्कुटरको डिजाइन एकदमै स्टाइलिस र आधुनिक देखिन्छ। अगाडिको भागमा ठाडो एलईडी डीआरएल र टर्न इन्डिकेटर सहितको एप्रन छ। यसमा ड्युअल टोन कलर स्किम, सिटको कन्ट्रास्ट कलर र ठूलो टीएफटी इन्स्ट्रयुमेन्ट क्लस्टर दिइएको छ ।

ई-एक्सेसमा ४.१ किलोवाट क्षमताको ब्याट्री प्याक जडान गरिएको छ, जसले एक पटकको चार्जमा करिब ९५ किलोमिटरको दूरी तय गर्न सक्छ। यसको अधिकतम गति ७१ किलोमिटर प्रतिघण्टा छ। यसको अगाडि र पछाडिका दुवै पाङ्ग्रा १२ इन्चको छ र डिस्क ब्रेकले सुसज्जित छ ।