बजाज चेतक र टीभीएस आई क्युबलाई टक्कर दिन आउँदै सुजुकी ई–एक्सेस, यस्तो हुनेछ विशेषता

जापनिज टु–ह्विलर ब्रान्ड सुजुकीले आफ्नो पहिलो इलेक्ट्रिक स्कुटर ई–एक्सेस लन्च गर्ने तयारीलाई अन्तिम चरणमा पुर्याएको छ ।

भारतमा केही समयअघि सम्पन्न अटो एक्सपो २०२५ मा सोकेस गरिएको ई–एक्सेसलाई कम्पनीले आगामी सेप्टेम्वरभित्रै लन्च गर्ने तयारी थालेको हो । ई–एक्सेस प्रिमियम सेग्मेन्टलाई लक्षित गरी आउन लागेको हो ।

निकै नै आकर्षक र आधुनिक डिजाइनमा तयार हुने यस स्कुटरमा सुजुकीले टीएफटी इन्स्ट्रयुमेन्ट क्लस्टरसहित एलईडी हेडलाइट, पछाडी स्टाइलिस टेल लाइट, स्मार्ट देखिने अलाेय ह्विल्स, फ्ल्याट फुटवेल, लामो र फराकिलो सिट र धेरै सामान अट्ने अन्डर सिट स्टोरेज दिने अपेक्षा गरिएको छ ।

सुजुकी एक्सेसमा ३.०७ किलोवाट आवर क्षमताको ब्याट्री प्याक उपलब्ध हुने जनाइएको छ । उक्त ब्याट्रीलाई एकपटक फुल चार्ज गर्दा ९५ किलोमिटर रेन्ज दिने दाबी गरिएको छ भने यसलाई ७१ किलोमिटर प्रति घण्टाको स्पिडमा हाँक्न सकिन्छ । सुजुकीले यस स्कुटरमा ४.१ किलोवाट क्षमताको मोटर उपलब्ध गराउने भएको छ ।

सो नयाँ स्कुटरले भारतमा होन्डा ई–एक्टिभा, बजाज चेतक, टीभीएस आईक्युब, ओला र एथरका विभिन्न मोडलसँग प्रतिस्पर्धा गर्ने अनुमान गरिएको छ । भारतमा लन्च भएपछि ई–एक्सेस नेपाली बजारमा समेत उपलब्ध हुनेछ ।