इन्जिनमा समस्या आएपछि सुजुकीले फिर्ता बोलायो यी तीन मोटरसाइकल

सुजुकीले भारतमा आफ्ना २५० सिसी बाइकहरु जीक्सर, जीक्सर एसएफ र भी–स्ट्रोम फिर्ता बोलाएको छ । यी बाइकको इन्जिन क्यामशाफ्टमा समस्या आएपछि रिकल गरिएको हो ।

मोटरसाइकलको इन्जिनहरू अचानक रोकिने र असामान्य आवाजहरू आउने गुनसो बढ्न थालेपछि यसको मेन्टिनेन्सका लागि बाइक फिर्ता बोलाइएको कम्पनीले जनाएको छ । समस्या कुन लट र कती मोटरसाइकलमा आएको भन्नेबारे कम्पनीले कुनै जानकारी वाहिर ल्याएको छैन ।

सुजुकीले समस्या भएको इन्जिनको ब्याच पहिचान गरी सम्बन्धित बाइक धनीलाई सम्पर्क गरिरहेको बताइएको छ । सुजुकीका आधिकारिक सर्भिस सेन्टरहरूमा त्रुटिपूर्ण भागलाई निःशुल्क रिप्लेस गरिनेछ।

तीनवटै मोटरसाइकलमा एउटै २४९ सीसीको लिक्विड कुल्ड सिंगल सिलिन्डर इन्जिन प्रयोग गरिएको छ । यो २५० सीसी मोडेलहरूको लागि दोस्रो रिकल हो । अत्यधिक इन्जिन कम्पन भएको भन्दै सन् २०२१ मा कम्पनीले १९९ यूनिट यस्ता मोटरसाइकल फिर्ता बोलाएको थियो ।