२ नयाँ इलेक्ट्रिक कारका साथ ईभी बजारमा प्रवेश गर्दै मारुती सुजुकी

मारुती सुजुकी पेट्रोल र डिजेल सेगमेन्टमा शीर्ष स्थानमा छ । तर, अब मारुती सुजुकी इलेक्ट्रिक कारको सेगमेन्टमा पनि प्रवेश गर्ने भएको छ । कम्पनीले यही वर्ष आफ्नो २ वटा नयाँ इलेक्ट्रिक कार लन्च गर्ने भएको छ । यद्यपि इलेक्ट्रिक कार सेगमेन्टमा टाटाको वर्चस्व रहेकाले मारुतीलाई इलेक्ट्रिक कारमा धेरै चुनौतीको सामना गर्नुपर्नेछ ।

मारुतीले सन् २०२३ अटो एक्सपोमा आफ्नो इलेक्ट्रिक कार मारुती सुजुकी ईभीएक्स विश्वव्यापी रूपमा सार्वजनिक गरेको थियो । मारुतीको नयाँ इलेक्ट्रिक कार सन् २०२४ मा लन्च गर्न सक्ने अपेक्षा गरिएको छ ।

मारुती सुजुकी ईभीएक्स इलेक्ट्रिक कारको रेन्ज ५५० किलोमिटरको हुनेछ । सो कार फ्रन्ट ह्विल ड्राइभ र अल ह्विल ड्राइभमा उपलब्ध हुनेछ । यसमा एलईडी हेडलाइट, वाई–साइज एलईडी डीआरएल, होरिजन्टल एलईडी लाइटिङ, प्यानोरामिक सनरुफ, ३६० डिग्री क्यामेरा र वायरलेस चार्जिङ जस्ता फिचर हुनेछ ।

मारुतीको दोस्रो इलेक्ट्रिक कार कम्प्याक्ट इलेक्ट्रिक ह्याचब्याक हुनेछ । हाल कम्पनीले यसको ब्याट्री र मोटरको बारेमा केही विवरण खुलासा गरेको छैन । तर, रिपोर्टका अनुसार मारुतीको सो इलेक्ट्रिक कारले फुल चार्जमा २०० देखि २५० किलोमिटरसम्मको रेन्ज दिने दाबी गरिएको छ ।

मारुती सुजुकीले सो कार पनि २०२४ मा लन्च गर्न सक्ने अनुमान गरिएको छ । सो कार लन्च भए पछि यसले टाटा टियागो र एमजी कोमेट ईभीसँग प्रतिस्पर्धा गर्नेछ ।