नाइमा मोबिलिटी एक्सपाेमा सनलङका २ ईभी भ्यान लन्च हुने, मूल्य कति ?

काठमाडौं -‘नाइमा नेपाल मोबिलिटी एक्सपाे २०२५’ मा चिनियाँ कमर्सियल भेइकल ब्रान्ड सनलङका दुई इलेक्ट्रिक माइक्रोभ्यान सार्वजनिक हुने भएका छन् ।

साउन २१ देखि सुरु हुने उक्त एक्सपोमा वेबर ग्रुप अन्तर्गतको ब्लु कर्पोरेसन प्रालिले सनलङको १२ र १३ सिटे माइक्रोभ्यान लन्च गर्ने भएको हो । कम्पनीले १२ सिटे सनलङ यू वानको मूल्य ४७ लाख ४७ हजार र १३ सिटे यू टुको मूल्य ५१ लाख ५१ हजार रुपैयाँ तोकेको छ ।

कम्पनीले नेपाल ल्याएको यू १ र यू २ इलेक्ट्रिक भ्यानमा क्रमशः ४६.३६ र ५०.२३ किलोवाट अवारको ब्याट्री प्याक रहेको छ । ८० किलोवाटको मोटर रहेको यी भ्यानहरूको रेन्ज क्रमशः ३२५ र ३५० किलोमिटरको रहेको छ । १५ इन्चको ह्विल रहेको सनलङको माइक्रोभ्यानमा १८० एमएमको ग्राउण्ड क्लियरेन्स रहेको छ ।

सनलङको यो माइक्रोेभ्यानमा एलसीडी ड्यासबोर्ड, यूएसबी चार्जिङ इन्टरफेस, एयर कण्डिसन, प्रेडेस्ट्रियन वार्निङ सिस्टम, रिभर्स पार्किङ सेन्सर, रिभर्स क्यामरा, फ्रन्ट पावर विण्डो लगायत फिचर छन् ।

सुरक्षाका लागि यी भ्यानहरूमा एबीएस, ईबीडी, ईपीएस, ईएससी ब्रेक असिस्ट, फ्रन्ट डिस्क रियर ड्रम ब्रेकिङ सिस्टम, सिटबेल्ट वार्निङ आदि फिचर रहेको छ ।

कम्पनीले यी इलेक्ट्रिक भ्यानसँग ३.३ किलोवाटको पोर्टेबल र ६.६ किलोवाटको वाल माउण्टेड चार्जर दिने जनाएको छ ।