नाडा अटो शो २०२४ : सर्बाधिक ६२० किमी सम्म रेन्ज दिने ईभी स्काइवेलको स्टल

काठमाडौं – नाडा अटो शो २०२४ काठमाडौंको भृकुटीमण्डपमा चलिरहेको छ । उक्त अटो शोमा विभिन्न सवारी साधन निर्माता कम्पनीहरुले फरक पहिचान सहित आफ्नो स्टल राखेका छन् ।

त्यही भीडमा फरक पहिचानका साथ उपस्थित भएको एक कम्पनी हो स्काइवेल । नेपालका लागि स्काइवेलको आधिकारिक वितरक जी मोटर्सले नेपालमै सबैभन्दा बढी रेन्ज दिने इलेक्ट्रिक कारको वारेमा जानकारी प्रदान गरिरहेको छ भने हालै नेपाल भित्र्याएको दुई नयाँ मोडल प्रदर्शनमा राखेको छ ।

नेपाली बजारमा सबैभन्दा बढी रेन्ज दिने इलेक्ट्रिक कार स्काइवेल ईटी५ हो । यसले सिंगल चार्जमा ६२० किलोमिटरको रेन्ज दिन्छ । गत वर्षको अटो शोमा सवारी साधन नराखेर पोस्टर मार्फत यो गाडीको चर्चा चलाएको जी मोटर्सले यसकै आधारमा हाल धेरै सवारी साधन बिक्री–वितरण गरिसकेको छ । सो गाडीको मूल्य १ करोड ९ लाख रुपैयाँ तोकिएको छ ।

हालै जी मोटर्सले यो भन्दा केही कम रेन्ज दिने ईभी स्काइवेल बीई११ समेत नेपाल भित्र्याएको छ । स्काइवेल बीई११ का दुई मोडल प्रदर्शनमा राखिएका छन् ।

स्काइवेल बीई११ का दुई मोडलमा क्रमशः ५१.९२ किलोवाट आवर र ७१.९८ किलोवाट आवर क्षमताको ब्याट्री हुनेछ । दुवैमा १५० किलोवाटको मोटर हुनेछ । यी दुई मोडलले सिंगल चार्जमा क्रमशः ४१० र ५२० किलोमिटर रेन्ज दिने छन् ।

यी दुई मोडलको मूल्य क्रमशः ७९ लाख ९० हजार रुपैयाँ र ८९ लाख ९० हजार रुपैयाँ हुनेछ ।

मुल प्रवेशद्वार नजिक प्रिमियम स्टलको रुपमा जी मोटर्सको स्टल रहेको छ । सवारी साधनप्रति विशेष रुचि राख्नेहरुका लागि यो स्टल आकर्षण बनिरहेको छ ।