स्कोडाको भारतमा ५ लाख युनिट कार उत्पादन, बिक्रीमा आयो उछाल

स्कोडा अटोले भारतमा ५ लाख युनिट कार उत्पादनको नयाँ माइलस्टोन हासिल गरेको छ । पुणेस्थित प्लान्टबाट ५ लाख औं युनिट स्कोडा कार रोलआउट गरेर कम्पनीले नयाँ उपलब्धि हासिल गरेको हो ।

फक्सवागन समुहको सहायक कम्पनीका रुपमा सञ्चालित स्कोडा अटो फक्सवागन इन्डियाले भारतमा पुणे र छत्रपति संभाजी नगरमा कार प्लान्ट स्थापना गरेको छ । स्कोडाले पहिलो पटक २००१ मा आफ्नो छत्रपति संभाजी नगर प्लान्टबाट अक्टाभिया रोलआउट गरेको थियो ।

स्कोडाका अनुसार, निर्माण गरिएका ५ लाख युनिटमध्ये ७० प्रतिशत पुणे प्लान्टमा उत्पादन गरिएको हो भने बाँकी छत्रपति संभाजी नगर प्लान्टमा निर्माण गरिएको थियो ।

कम्पनीले घरेलु बजारको लागि मात्रै नभई आफ्नो केही मोडलको सिकेडी विदेशमा समेत निर्यात गर्दै आएको छ । स्कोडा इन्डियाबाट पठाइएको स्पेयर पार्टस जडान गरी भियतनाममा यसको कुशाक र स्लाभिय मोडल तयार हुँदै आएको छ ।

स्कोडाले हालै भारतमा आफ्नो अहिलेसम्मकै उच्च अर्धवार्षिक बिक्री दर्ता गरेको छ । कार निर्माताले जनवरी देखि जुन २०२५ सम्म ३६ हजार १९४ युनिट कार बिक्री गरेर रेकड कायम गरेको हो । जुन गत वर्षको सोही अवधिको तुलनामा १३४ प्रतिशतले वढि हो ।

स्कोडाका कार नेपाली बजारमा समेत उपलब्ध छन् । एमएडब्लु ग्रुपले बिक्री गर्दै आएको यस ब्रान्ड अन्तर्गत हाल बजारमा कुशाक, स्लाभिया, सुपर्व, कारोक र कोडियाक जस्ता मोडल उपलब्ध छन् । यि कारको मूल्य ५० लाखदेखी २ करोडसम्म पर्छ ।