सिप्रदी अब दुई पांग्रे सवारी बजारमा प्रवेश, नेपालकै बाइक निर्माता यात्रीसँग सहकार्य गर्ने

काठमाडौं – नेपालमा टाटा गाडीको आधिकारिक वितरक सिप्रदी ट्रेडिङ कम्पनी अब दुई पांग्रे सवारी बजारमा प्रवेश गर्ने भएको छ । सिप्रदीले नेपालमै बन्ने इलेक्ट्रिक बाइक यात्रीको निर्माता यात्री मोटरसाइकल्ससँग सहकार्य गर्ने भएको छ ।

यद्यपि यस सम्बन्धी औपचारिक जानकारी दुवै पक्षबाट सार्वजनिक भएको छैन । प्राविधिक पक्ष यात्रीले हेर्ने र बजारीकरण पक्ष सिप्रदीले हेर्ने गरी हाल कार्य अगाडि बढाउने र आगामी दिनमा थप कार्य गर्दै जाने बताइएको छ ।

यात्रीले नेपाली बजारमा पी–० र पी–१ मोटरसाइकल ल्याएको थियो र आगामी दिनमा अन्य मोडल समेत ल्याउने योजनामा रहेको थियो ।

पी–१ ले १९ एचपी पावर र ४३० एनएम टर्क जेनेरेट गर्छ । यसले सिंगल चार्जमा ११० किलोमिटर माइलेज दिन्छ ।

यसमा ३ किलोवाट आवरको लिथियम आयोन ब्याट्री छ । यसको टप स्पिड १०० किलोमिटर प्रतिघण्टा छ । यसलाई फास्ट चार्जरबाट १ घण्टा र सामान्य चार्जरबाट ६ घण्टामा फुल चार्ज गर्न सकिन्छ ।

केही समय पहिले नेपालमा बनेको मोटरसाइकलले नम्बर प्लेट नपाएको चर्चा समेत चलेको थियो । यो अवस्थामा पछि सरकारले यसका लागि आवश्यक व्यवस्था गरेको थियो ।