सिप्रदी र यात्रीबिच दुई पांग्रे विद्युतीय सवारी उत्पादनका लागि भएको सम्झौताले ल्याएको नयाँ आशा

“मेड इन नेपाल” दुइ पांग्रे विद्युतीय सवारी साधन उत्पादन गर्नका लागि नेपालकै प्रतिष्ठि ब्रान्ड सिप्रदी र यात्रीबिच रणनितिक साझेदारीका लागि सम्झौता भएको छ । यसबाट नेपाली अटोमोबाइल उद्योगमा एउटा नयाँ आशाको किरण जगाएको छ ।

नेपाली बजारमा टाटाका सवारी साधन बिक्री–वितरण गरिरहेको सिप्रदी र विद्युतीय मोटरसाइकल उत्पादन गरिरहेको यात्रीबिच स्वदेशमै विद्युतीय दुइ पांग्रे सवारी साधन उत्पादन गर्नका लागि रणनीतिक साझेदारीको रुपमा सम्झौता भएको छ । देशको बाटो र माटो सुहाउँदो तथा नेपाली ग्राहकवर्गको बदलिँदो इच्छा एवं आवश्यकतालाई परिपूर्ति गर्ने विश्वासको साथ सिप्रदी र यात्रीले गुणस्तरीय दुइ पांग्रे सवारी उत्पादन गर्न यो सम्झौता भएको हो ।

देशकै प्रतिष्ठित ब्रान्ड सिप्रदी मुख्यतः अटोमोटिभ तथा एलाइड व्यवसायमा सन् १९८२ वर्षदेखि आवद्ध रहेको छ । नेपालमै पहिलो इलेक्ट्रिक मोटरसाइकल पी–० र पी–१ बनाएर चर्चा कमाएको यात्री, नेपाली युवाहरुको बीचमा चर्चित ब्रान्ड हो । यात्री डिजाइन स्टुडियोले उत्पादन गरेको यात्री मोटरसाइकल नेपाली विद्युतीय दुइ पांग्रे उत्पादन उद्योगमा कोशेढुंगा साबित भएको छ ।

भविष्यमुखी सोच एवं आधुनिक प्रविधिलाई आत्मसात गर्दै देशमा वातावरणमैत्री यातायात प्रणाली विकास एवं विस्तार गर्नुका साथै नेपाली युवा व्यवसायिलाई प्रोत्साहन गर्नका लागि यो सम्झौता प्रभावकारी हुने विश्वास दुवै पक्षले लिएको छ ।

यसबाट नेपाली अटोमोबाइल व्यवसायी र युवा पंक्तिमा पनि केही आशा जगाएको छ ।