श्री एसटीसी ग्रुपबाट बागमती प्रदेश सरकारलाई २ सय थान अक्सिजन सिलिन्डर सहयोग हस्तान्तरण

काठमाडौं – श्री एसटीसी ग्रुपले कम्पनीको सामाजिक उत्तरदायित्व अन्तर्गत बागमती प्रदेश सरकारलाई २ सय थान अक्सिजन सिलिन्डर प्रदान गरेको छ । कोभिड–१९ को दोस्रो लहरको महामारीसँगै देशका विभिन्न क्षेत्रमा व्यापक अक्सिजन एवम् अक्सिजन सिलिन्डर अभावले धेरै बिरामीले ज्यान गुमाउनु परेको र अक्सिजन सिलिन्डर पर्याप्त नभएको अवस्थामा विभिन्न व्यावसायिक प्रतिष्ठानहरुबाट सरकारलाई सहयोग आउने क्रम जारी रहेको अवस्थामा श्री एसटीसी ग्रुपले समेत सहयोग प्रदान गरेको हो ।

श्री एसटीसी ग्रुपका प्रबन्ध निर्देशक सुरेन्द्र कुमार उप्रेती र निर्देशक कृष्ण प्रसाद दुलाल लगायतले २ सय थान अक्सिजन सिलिन्डर एवम् सिलिन्डर रेगुलेटर बागमती प्रदेश सरकारका मुख्यमन्त्री डोरमणि पौडेललाई हस्तान्तरण गरे ।

देशलाई परेको यस्तो स्वास्थ्य संकटको अवस्थामा नागरिक सुरक्षाका लागि श्री एसटीसी ग्रुप हातेमालो गर्न सधै तयार रहने कम्पनीका प्रबन्ध निर्देशक सुरेन्द्र कुमार उप्रेतीले बताए ।

मुख्यमन्त्री पौडेलले कोभिड–१९ संक्रमित बिरामीहरुको उपचार व्यवस्थापनका लागि आवश्यक पर्ने जीवनदायक अक्सिजन सिलिन्डर उपलब्ध गराएकोमा श्री एसटीसी ग्रुपलाई धन्यवाद दिए । उनले सरकारलाई आवश्यक पर्ने यस प्रकारको मानवीय सहयोग उपलब्ध गराउने व्यवसायीहरुलाई हर प्रकारका सहुलियत उपलब्ध गराउने प्रतिबद्धता समेत व्यक्त गरे ।

श्री एसटीसी ग्रुप नेपालमा अटोमोबाइलका विभिन्न ब्रान्डका स्पेयर पार्ट्स, टायर, ल्युब तथा ब्याट्रीको आधिकारिक बिक्रेता एवम् उत्पादक कम्पनी हो ।