एमजी म्याजेस्टरको उत्पादन शुरु, नेपालमा प्रतिक्षा

जेएसडब्ल्यू एमजी मोटर इन्डियाले आफ्नो फ्ल्यागशिप एसयूभी म्याजेस्टरको उत्पादन सुरु भएको घोषणा गरेको छ । एसयूभी गुजरातमा रहेको ब्रान्डको हलोल प्लान्टमा उत्पादन भइरहेको छ ।

भारतमा हाल यसको प्रि–बुकिङ समेत सुरु भैसकेको छ । बुकिङका लागि ग्राहकले ४१ हजार भारु भुक्तानी गर्नुपर्ने वताइएको छ । निकै नै शक्तिशाली इन्जिन र आधुनिक फिचरले भरिपूर्ण यस एसयूभी सार्बजनिक भएयता चर्चामा रहँदै आएको छ ।

एमजी म्याजेस्टरमा २.० लिटर, ट्विन टर्बो डिजेल इन्जिन जडान गरिएको छ, जसले २१३ बीएचपी र ४७८ एनएम टर्क जेनेरेट गर्दछ । इन्जिन ८ स्पीड अटोमेटिक ट्रान्समिसन र लकिङ डिफरेंशियल सहितको फोर वाई फोर सिस्टमसँग जोडिएको छ ।

६ र ७ सिट लेआउटमा उपलब्ध यस एसयूभीमा १२.३–इन्च टचस्क्रिन इन्फोटेनमेन्ट सिस्टम, डिजिटल इन्स्ट्रुमेन्ट क्लस्टर, प्यानोरामिक सनरुफ, मसाज फंक्सन सहितको भेन्टिलेटेड फ्रन्ट सिट, १२ वे पावर ड्राइभर सिट, जेस्चर कन्ट्रोल सहितको पावर टेलगेट र दुई वटा वायरलेस स्मार्टफोन चार्जर लगायत विशेषता उपलब्ध गराइएको छ । यसमा लेभल २ एडास, ३६० डिग्री क्यामेरा, ६ वटा एयरब्याग र १० वटा अफरोड मोड समावेश छन् ।

जेएसडब्लू एमजी मोटर इण्डियाले म्याजेस्टरमा ५ वर्षको असीमित किलोमिटर वारेन्टी, ५ वर्षको रोडसाइड सहायता र ५ वटा लेवर फ्री सर्भिस प्रदान गर्ने जनाएको छ ।

एमजी म्याजेस्टर नेपाली बजारमा समेत प्रतिक्षा गरिएको एसयूभी हो । भारतमा बिक्री प्रारम्भ भए लगत्तै यो नयाँ एसयूभी नेपाली बजारमा समेत उपलब्ध हुने अनुमान गर्न सकिन्छ । भारतमा उत्पादन हुने एमजीका उत्पादन बिक्री गर्नेगरी हालैमात्र जीओ आटेमोबाइल्स नियुक्त भएको छ । कम्पनीले हाल एमजी विन्डसर, कोमेट र नयाँ हेक्टर बिक्री गर्दै आएको छ ।