धुलिखेलमा सवारी सुरक्षा सम्बन्धी कार्यक्रम सम्पन्न

काठमाडौं – नासा नेपालको सहकार्यमा धुलिखेल क्याम्पस, धुलिखेल काभ्रेमा सवारी सुरक्षा सम्बन्धी कार्यक्रम ‘हेल्मेट्स फर लाइफ, ओरिएन्टेसन अफ सेफ्टी राइडिङ’ आयोजना भएको छ ।

करिब ५० जना दुई पाङगे्र सवारी साधन प्रयोगकर्ता सहभागी भएका सो कार्यक्रममा एफआईए वर्ल्ड काउन्सिल मेम्बर गोविन्द भट्टराईले नेपालमा दुई पांग्रे सवारी दुर्घटनाको अवस्था, सेफ्टी राइडिङ्ग तरिका, गुणस्तरीय हेल्मेटको बनावट र महत्वको बारेमा प्रस्तुतिकरण गरेका थिए ।

सोही अवसरमा आयोजना भएको ‘स्लो बाइक राइडिङ कम्पिटिसन’ मा ६ जना प्रतिस्पर्धीले भाग लिएका थिए । जसमध्ये सरोज खड्गीले प्रथम स्थान हासिल गर्दा विकास तामाङ दोश्रो भए । कार्यक्रममा नासा नेपालद्वारा तयार गरिएको ‘सुरक्षित मोटरसाइकल र स्कुटर यात्राका लागि जानकारी’ पर्चाको वितरण गर्नुका साथै सांकेतिक रुपमा सुरक्षित हेल्मेटको वारेमा ज्ञान दिलाउनका लागि एफआईए हेल्मेट वितरण गरिएको थियो ।

धुलिखेल क्याम्पसका क्याम्पस प्रमुख सागर तिवारीले सवारी सुरक्षा सम्बन्धी जनचेतनामूलक कार्यक्रमले ठुलो महत्व राख्ने बताउदै सवारी चालकले सवारी साधन चलाउदा विशेष ध्यान पु-याएर चलाउनु पर्ने र सुरक्षित हेल्मेटको प्रयोग गर्नु पर्ने धारणा व्यक्त गरे ।

कार्यक्रममा नासा नेपालका सचिव निरज खड्का, राष्ट्रिय युवा परिषदका जिल्ला अध्यक्ष प्रकाश रोका, नासा नेपालका ब्रान्डिङ अफिसर सौगात राजभण्डारी लगायतको सहभागिता रहेको थियो ।