आर१५ को इन्जिन राखेर यामाहाले ल्याउने भयो आरएक्स१५५

जापजिन टु ह्विलर यामाहाले आफ्नो लोकप्रिय सिरिज आरएक्सलाई पुन बजारमा उतार्ने भएको छ । यामाहाले सन् २०२२ भित्रै भारतीय बजारमा नयाँ बाइक आरएक्स १५५ लाई उतार्ने भएको हो । सोहि क्रममा कम्पनीले यसअघिको आरएक्स १०० कै लुक्समा आधारित यसको डिजाइन समेत तयार गरिसकेको छ । यो बाइकमा आर१५ मा उपलब्ध गराइएको १५५ सीसी क्षमताको इन्जिन जडान गर्ने यामाहाले जनाएको छ । १९८५ देखी २००५ सम्म भारतीय बजारमा उत्पादन गरी बिक्री बितरण गर्दै आएको आरएक्स १०० ले नेपालमा समेत राम्रै चर्चा कमाएको थियो ।

नयाँ बाइकको डिजाइन ब्ल्याक कलर थिममा गरिएको छ । सार्बजनिक गरिएको डिजाइन अनुसार यसको इन्जिन, फेन्डर, सस्पेन्सन, साइड प्यानल, स्पोक ह्विल लगायत अधिकांश भागलाई कालो कलारमा समायोजन गरिएको छ । सर्कुलर हेडल्याम्प, ट्विन पोड इन्स्ट्रुमेन्ट कन्सोल र फराकिलो ह्यान्डलबारले यस बाइकको लुक्सलाई थप क्लासिक बनाएको देख्न सकिन्छ । यामाहाले यो बाइकको सस्पेन्सनलाई भने कुनै परिबर्तन नगर्ने बताएको छ । अगाडी टेलिस्कोपिक फर्क र पछाडी डुअल सस्पेन्सन उपलब्ध गराइने छ ।

फिचर्सका बारेमा बिस्तृत बिरणहरु सार्बजनिक भैनसके पनि यसमा कम्तिमा पनि सिंगल च्यानल एबिएस भने उपलब्ध हुने अनुमान लगाइएको छ । आर१५ कै इन्जिन जडान गरिने हुँदा अधिकांश स्पेशिफिकेसन सोही बाइकसंग मिल्ने देखिन्छ । यामाहाले हालसालै लन्च गरेको आर१५ भी४ मा क्लच फ्रि गियर सिफ्टिङका लागी क्विक सिफ्टर र ट्र्याक्सन कन्ट्रोल जस्ता सेफ्टि फिचर्स समेत दिएको छ । यो फिचर्स आरएक्स१५मा समेत उपलब्ध हुने अनुमान गरिएको छ । यसको इन्जिनले १८.४ पिएस पावर र १४.२ एनएम टर्क जेनेरेट गर्नेछ ।