रोयल इन्फिल्ड स्क्र्याम्वलर ६५० उत्पादनको अन्तिम चरणमा

रोयल इन्फिल्डले निकट भविष्यमा लन्च गर्ने तयारी थालेको नयाँ मोडल उत्पादनको अन्तिम चरणमा पुगेको छ । अर्को वर्षको सुरुवाती महिनामा लन्च हुने अनुमान गरिएको स्क्र्याम्वलर ६५० लाई अहिले कम्पनीले परिक्षण गरिरहेको छ ।

रोयल इन्फिल्डले सो बाइकलाई यसअघि पुरै छोपेर परिक्षण गर्दै आएपनि हालका दिनमा भने नढाकीकन परिक्षण गर्न थालिएको छ । जसको आधारमा यो नयाँ बाइक अव उत्पादनको अन्तिम चरणमा पुग्न लागेको अनुमान गरिएको हो ।

स्क्र्याम्बल ६५० लाई कम्पनीले इन्टरसेप्टर ६५० मा आधारित भएर निर्माण गर्न लागेको हो । सो नयाँ बाइकको अगाडी १९ र पछाडी १७ इन्चको ब्लक प्याट्रन टायर सहितको स्पोक ह्विल जडान हुनेछ । यसको अगाडी तलमाथी गर्न मिल्ने फोर्क हुनेछ भने बाइकमा एउटामात्र एक्जस्ट पाउन सकिनेछ ।

सो बाइकमा पूर्णत एलइडी लाइट, रिब्ड प्याट्रन सीट, अफसेट सिंगल–पड इन्स्ट्रयुमेन्ट कन्सोल, अग्लो ह्यान्डलबार र अफरोडमा समेत सहज यात्रा गर्न मिल्नेगरी लामो सस्पेन्सन लगायत फिचर उपलब्ध हुनेछन् । सो बाइकमा रोयल इन्फिल्डले इन्टरसेप्टर ६५० कै इन्जिन दिनसक्ने संभावना देखिएको छ ।