३५०-६५० सिसी सेग्मेन्टमा रोयल इनफिल्डको एकलौटी बजार, वार्षिक बिक्री १० लाख नाघ्यो

रोयल इनफिल्डले २०२५ मा हालसम्मकै धेरै मोटरसाइकल बिक्री गरेको छ । कम्पनीले १ वर्षमा १० लाख ७१ हजार ८०९ युनिट मोटरसाइकल बिक्री गरेर भारतमा नयाँ रेकर्ड बनाएको हो ।

सन् २०२४ मा कुल ८ लाख ५७ हजार ३७८ युनिट मोटरसाइकल बिक्री गरेको कम्पनीले एकै वर्षमा बिक्री २५ प्रतिशतले बडाएको छ । त्यसैगरी, निर्यात समेत ३६ प्रतिशतले बढाएको छ । गत वर्ष ९७ हजार ३७१ युनिट मोटरसाइकल निर्यात गरेको कम्प्नीले अघिल्लो वर्ष १ लाख ३२ हजार १३२ युनिट मोटरसाइकल निर्यात गर्न सफल भएको हो । कम्पनीले हाल ४ फरक इन्जिन प्लेटफर्ममा आधारित कुल १४ मोडलका मोटरसाइकल बिक्री गर्दै आएको छ ।

कम्पनीका अनुसार, अगस्टदेखि अक्टोबरसम्म लगातार तीन महिनामा मासिक बिक्री १ लाख युनिटभन्दा बढी भएको थियो, जसमा अक्टोबरमा १ लाख १६ हजार ८४४ युनिटसहित रेकर्ड ब्रेक मासिक बिक्री हाँसिल गरेको थियो ।

भारतीय अटोमोबाइल उद्योगमा जिएसटी २.० दर कटौतीको पूर्ण लाभ ग्राहकहरूलाई हस्तान्तरण गर्ने घोषणा गर्ने पहिलो कम्पनीमध्ये एक बनेको रोयल इनफिल्डले आफ्नो लोकप्रिय ३५० सीसी मोडेलमा २२ हजार भारुसम्म मूल्य घटाएको थियो ।

रोयल इनफिल्डको कुल बिक्रीमा सबैभन्दा ठूलो योगदान क्लासिक ३५० ले दिएको छ । यस मोडलले भारतको ३५० सिसी सेग्मेन्टमा ३७ प्रतिशत हिस्स ओगट्ने जनाइएको छ । ३५० देखी ६५० सिसी सेग्मेन्टमा रोयल इनफिल्डका उत्पादनले बजारमा एकलौटी जस्तै बजार लिइरहेको छ ।

भारतमा जस्तै नेपाली बजारमा समेत रोयल इनफिल्डका मोटरसाइकल निकै लोकप्रिय बनिरहेका छन् । अल्फा अटोमोटिभ्सले बिक्री थालेयता यस ब्रान्डका मोटरसाइकल बर्षमै १० हजारभन्दा बढि युनिट बिक्री भइरहेको छ । नेपालमा यसको अत्याधुनिक र सुबिधासम्पन्न एसेम्वल प्लान्ट समेत सञ्चालनमा छ ।