नोभेम्बर १ मा लन्च हुने रोयल इन्फिल्ड हिमालयन ४५० को प्रोडक्सन रेडी इमेज लिक, फिचर सार्वजनिक

भारतमा आगामी नोभेम्बर १ मा अफिसियल रुपमा लन्च हुने भनिएको रोयल इन्फिल्ड हिमालयन ४५० को प्रोडक्सन रेडी इमेज लिक भएको छ । यसबाट सो मोटरसाइकलको डिजाइन र फिचरको विस्तृत विवरण सार्वजनिक भएको छ । लिक तस्बिरका आधारमा यसप्रति चासो भएकाहरुले महत्वपूर्ण विवरण पाउन सफल भएका छन् ।

लिक गरिएका तस्बिरहरूले हिमालयन ४५० ले हालको मोडलको परिचित सिल्हुट कायम राखेको, तर नयाँ एलिमेन्ट सहितको फिचर उपलब्ध भएको देखाएको छ । अगाडिको छेउमा सुपर मेटियर ६५० जस्तै एलईडी हेडल्याम्प रहेको देखिन्छ। हेडल्याम्प एसेम्बली अब सीधै चेसिसमा माउन्ट गरिएको छ, जुन हालको हिमालयको सेटअपबाट अलग छ। यसबाहेक, एलईडी टर्न इन्डिकेटरहरू र स्प्लिट–टाइप फ्रन्ट फेन्डर पनि नयाँ डिजाइनको अंश बनेका छन् ।

हालको मोडलको बक्सी आकारको तुलनामा इन्धन ट्यांकी राउन्ड प्रोफाइल सहितको छ । साइड प्यानल र टेल सेक्सन खण्डले पनि डिजाइन ल्यांग्वेजलाई पछ्याएका छन् । लङ राइडमा कम्फर्ट प्रदान गर्नका लागि मोटरसाइकलमा रिडिजाइन गरिएको स्प्लिट सिट रहेको छ । पछाडि टप बक्स माउन्टिङको लागि डिजाइन गरिएको नयाँ लगेज र्याक थप गरिएको एक उल्लेखनिय फिचर हो । किकस्ट्यान्ड पनि कास्ट कन्स्ट्रक्शनको साथ परिमार्जन गरिएको छ।

हिमालयन ४५० मा सबै नयाँ चेसिसहरू प्रयोग गरिएको छ, जुन बोल्ट–अन रियर सबफ्रेमको साथ उपलब्ध छ । यस डिजाइनले विभिन्न भू–भागहरूमा यात्रा गर्नका लागि बल र स्थायित्व बढाउने अपेक्षा गरिएको छ। हालको हिमालयनको कर्ब वेट १९९ केजीलाई ध्यानमा राखी नयाँ मोडल हल्का हुने अनुमान गरिएको छ ।

रोयल एनफिल्डको पहिलो लिक्विड–कुल्ड इन्जिन हुनु र यसका आधारमा हाइलाइट गरिने पावरट्रेन यसको अर्को पक्ष हो । यसमा भएको ४५० युनिटले लगभग ३५ देखि ४० बीएचपी पावर जेनेरेट गर्ने र यसलाई ६–स्पिड गियरबक्ससँग जोडिने बताइएको छ । सो इन्जिनलाई भविष्यमा रोयल इन्फिल्डका अन्य मोडलहरूमा पनि प्रयोग गरिने अपेक्षा गरिएको छ ।

लिक गरिएको तस्बिरका आधारमा नयाँ हिमालयन ४५० को अगाडि अपसाइड–डाउन फोर्क सेटअप र पछाडि प्रिलोड–एडजस्टेबल मोनोशक छ भन्न सकिन्छ । यसमा नयाँ डिस्क ब्रेक र ड्युअल–पर्पज टायर हुने छन् । ड्युअल च्यानल एबीएस र सम्भावित ट्र्याक्सन कन्ट्रोलले बाइकलाई थप सुरक्षित बनाएको छ ।

हाल बजारमा प्रचलित केटीएम ३९० एडभेन्चर र बीएमडब्ल्यु जी ३१० जीएससँग यसको प्रतिस्पर्धा हुने अनुमान गर्न सकिन्छ ।