इतिहास : रोयससँग रोल्सको भेट, जसले गर्दा रोल्स–रोयस मोटर कार्स बन्यो

हेनरी रोयस गरिब परिवारमा जन्मेका थिए र ९ वर्षकै उमेर देखि काम गर्न थालेका थिए । चार्ल्स रोस भने धनी परिवारका थिए र क्याम्ब्रिजको ट्रिनिटी कलेजमा अध्ययन गरेका थिए ।

यी दुई जना व्यक्ति फरक पृष्ठभूमिका भए पनि दुई कुरामा भने समानता थियो – दुवै जना इन्जिनियरिङ पृष्ठभूमिका थिए र दुवैले संसारकै सबैभन्दा ठूलो कार कम्पनी बनाउने इच्छा राख्थे । सन् १९०४ को मे ४ मा आजकै दिन म्यानचेस्टरको मिडल्यान्ड होटलमा आयोजना गरिएको लन्च मिटिङ पश्चात यी दुई जना बीच पार्टनरसिपको प्रारम्भ भएको थियो ।

यसरी भेटघाट हुनु भन्दा पहिले रोल्सले बेल्जियम र फ्रान्सबाट कार आयात गरी बिक्री गर्ने डिलरसिप संचालन गरेका थिए । यद्यपि उनले बेलायतकै कार बिक्री गर्न चाहन्थे । त्यसैगरी रोयसले आफ्नो इन्जिनियरिङ पृष्ठभूमिको प्रयोग गर्दै १० एचपी कार उत्पादन गर्नका लागि प्रयोग गरिरहेका थिए ।

यो समयमा रोयसका साथी तथा उनका अटोमोबाइल व्यापारका सेयर होल्डर हेनरी एडमन्ड्सले यी दुवै जनाका बीचमा समानता रहेको बुझेर दुई जनाका बीच भेटघाटको प्रबन्ध मिलाएका थिए । यसले गर्दा रोल्स रोयस मोटर कार उत्पादनका लागि हेनरी एडमन्ड्सलाई नै श्रेय दिइन्छ ।

रोल्सले तीन वा चार सिलिन्डर कार रुचाउथे । तर रोयसले उत्पादन गरेको दुई सिलिन्डर कार देखे पछि भने उनको मन बदलियो । भेटघाट पश्चात डिसेम्बरमा रोयसले जति पनि कार उत्पादन गर्छन् सबै बेच्न रोल्स तयार भए । त्यसपछि रोल्स–रोयस ब्याज समेत बन्यो ।

अनि विभिन्न छलफल पश्चात सन् १९०६ को मार्च १५ मा रोल्स–रोयस मोटर कार्स कम्पनी बन्यो । रोल्स रोयस आज संसारकै लोकप्रिय कम्पनी मानिन्छ ।